Ambasada thotë se taksa e minon partneritetin me ShBA-në: Zyrtarët amerikan sollën mesazhin e Trumpit për heqjen e taksës

Prishtinë | 28 Shk 2019 | 18:05 | Nga Ekonomia Online

Ambasada amerikane në Kosovë, ka njoftuar rreth takimit të së mërkurës ndërmjet zyrtarëve të lartë amerikan me presidentin e vendit, Hashim Thaçi, transmeton EO.

Sipas njoftimi, mysafirët erdhën për të përforcuar porosinë e Presidentit Trump, siç thuhet, “për të zënë këtë moment unik … dhe për t’u përmbajtur nga veprimet që do ta bënin arritjen e një marrëveshjeje më të vështirë”.

Tutje njoftimi bën të ditur se taksa është pengesë për zhvillimin e dialogut, e cila poashtu minon partneritetin me ShBA-në dhe si e tillë duhet të pezullohet.

Ky është njoftimi i plotë i ambasadës së ShBA-së në Kosovë:

Zëvendësdrejtori i Lartë për Evropë i Këshillit të Sigurisë Kombëtare (NSC) John Erath dhe Drejtori i NSC-së për Çështje Evropiane, Brad Berkley, u takuan dje me Presidentin Thaçi dhe Kryeministrin Haradinaj, pas vizitës në Beograd dhe takimeve me udhëheqësit e qeverisë së Serbisë.

Mysafirët erdhën për të përforcuar porosinë e Presidentit Trump “për të zënë këtë moment unik … dhe për t’u përmbajtur nga veprimet që do ta bënin arritjen e një marrëveshjeje më të vështirë”.

Në të dyja kryeqytetet ata theksuan shqetësimin e Shtëpisë së Bardhë se Dialogu duhet kthyer në binarë, dhe se të dyja palët duhet të ndërprenë veprimet provokuese dhe të ndërmarrin hapa konstruktivë për tu kthyer në tryezën negociuese.

Mysafirët përsëritën mesazhin e tyre nga letra ndërinstitucionale e 11 shkurtit se taksat në prodhimet e Serbisë dhe Bosnies janë pengesë në rrugën drejtë progresit, e minojnë partneritetin tonë, dhe duhet të pezullohen në mënyrë që Dialogu me Serbinë të lëvizë përpara.

Ata theksuan urgjencën që Kosova të arrijë një marrëveshje gjithëpërfshirëse të normalizimit me Serbinë, dhe rreshtimin SHBA-Kosovë për këtë interes të përbashkët strategjik.

Të ngjashme