Gjermania njoftoi të enjten një bllokim mbarëkombëtar për të pavaksinuarit, pasi drejtuesit e saj mbështetën planet për vaksinime të detyrueshme në muajt e ardhshëm, transmeton EkonomiaOnline.

Personave të pavaksinuar do t’u ndalohet hyrja në të gjitha bizneset, përveç atyre më thelbësore, si supermarketet dhe farmacitë, për të frenuar përhapjen e koronavirusit, njoftuan të enjten kancelarja në largim Angela Merkel dhe pasardhësi i saj, Olaf Scholz, pas bisedimeve të krizës me liderët rajonalë. Ata që janë shëruar së fundmi nga Covid-19 nuk mbulohen nga ndalimi.

Dyshja mbështeti gjithashtu propozimet për vaksinimet e detyrueshme, të cilat nëse votohen nga parlamenti mund të hyjnë në fuqi nga shkurti më herët, shkruan CNN.

Sipas kufizimeve të shtrënguara, personat e pavaksinuar mund të takojnë vetëm dy persona nga një familje tjetër. Baret dhe klubet e natës duhet të mbyllen në zonat me një shkallë incidence mbi 350 raste për 100,000 njerëz gjatë një jave. Dhe vendi do të kufizonte numrin e njerëzve në ngjarje të mëdha si ndeshjet e futbollit.

Njoftimi vjen ndërsa Gjermania lufton me një rritje të rasteve që e kanë shtyrë Evropën përsëri në epiqendrën e pandemisë, duke rritur frikën mbi variantin e sapo zbuluar Omicron.

Konferenca për shtyp është gjithashtu e fundit e Merkelit përpara se ajo të largohet nga detyra; një notë e zymtë për t’i dhënë fund 16 viteve të saj si kancelare gjermane.