Pep Guardiola pranoi se ishte “shumë i lodhur” dhe shpërtheu në lot pasi periudha e tij legjendare 10-vjeçare si trajner i Manchester Cityt përfundoi me një humbje 2-1 ndaj Aston Villas të dielën.

Strategu ikonik spanjoll, i cili fitoi 20 trofe gjatë një dekade historike në “Etihad Stadium”, insistoi se largimi tani është “vendimi i duhur” si për klubin ashtu edhe për lojtarët.

Guardiola pati vështirësi të përmbante emocionet në fushë pas vërshëllimës së fundit.

Ndeshja shënoi gjithashtu paraqitjet e fundit për shtyllat e klubit Bernardo Silva dhe John Stones.

Pavarësisht se City kaloi në epërsi 1-0 falë golit të 11-të të Antoine Semenyo që nga transferimi i tij në janar nga Bournemouth, Aston Villa e Unai Emeryt reagoi fuqishëm.

Një dopietë në pjesën e dytë nga Ollie Watkins bëri që fituesit e Ligës së Evropës ta prishnin festën e lamtumirës duke siguruar një fitore 2-1.

Duke komentuar lamtumirën emocionale, trajneri tha: “Unë nuk qaj, por kur pashë Bernardon duke qarë, qava edhe unë. I thashë të mos qante, por ndodhi. Ishte një moment kaq i veçantë. Emocionet ishin shumë të forta. Nuk do ta harroj kurrë”.

Duke reflektuar mbi largimin pas një dekade historike në krye të ekipit, Guardiola shprehu hapur lodhjen e tij.

Ai deklaroi: “Jam shumë i lodhur. Seriozisht, jam shumë i lodhur. Bëra gjithçka. Ne e bëmë. Kujtimet që kam nga Barcelona dhe Bayern Munich janë të pakrahasueshme, por bagazhi i kujtimeve që kam nga këtu për 10 vite është më i madh se kudo tjetër”.

Që nga ardhja e tij në verën e vitit 2016, spanjolli drejtoi 593 ndeshje, duke siguruar 423 fitore, 77 barazime dhe 93 humbje.

Ai theksoi se lidhjet njerëzore kishin më shumë rëndësi sesa trofetë, duke shtuar: “Pa trofetë do të isha shkarkuar, por nuk janë trofetë në dollapin e shtëpisë që më bëjnë të lumtur. Janë kujtimet dhe lidhjet që kam pasur që nga dita e parë me qytetin, stafin dhe lojtarët”.

Pavarësisht lamtumirës emocionale, mjeshtri taktik insistoi se largimi i tij është më i miri për gjigantët e Premierligë, teksa ata hyjnë në një epokë të re.

“Është koha e duhur. Nuk do të më mungojë për një kohë, kjo është e sigurt. E ndiej thellë se ky është vendimi i duhur për këtë klub dhe për lojtarët. E falënderoj klubin që e respektoi këtë vendim, ata e kuptuan”, tha ai.

Trajneri largohet pasi ka fituar plot 20 trofe me Manchester Cityn, përfshirë gjashtë tituj të Premierligës, një Ligë të Kampionëve, tre FA Cup dhe pesë Kupa të Ligës (Carabao Cup)./GazetaExpress/