Kai Trump, mbesa 18-vjeçare e presidentit amerikan Donald Trump, është bërë virale në rrjetet sociale pasi postoi një video në TikTok ku shihet duke punuar pas banakut në një pikë drive-thru të Dunkin’ Donuts.

Në klipin që tërhoqi vëmendjen e ndjekësve të saj, Kai shfaqet duke marrë porosi, duke pranuar pagesën dhe duke shpërndarë një kafe, ndërsa mban veshur uniformën e rrjetit të famshëm amerikan. Ndonëse në pamje të parë duket si një punë e përkohshme, gjithçka rezulton të jetë një pjesë e planifikuar për promovimin e videos së saj më të re në YouTube.

Videoja në fjalë, e titulluar “Kai Trump ha dhe pi GJITHÇKA në Dunkin’ Donuts”, është postuar në kanalin e saj që numëron mbi 1.16 milion abonentë. Në të, Kai, së bashku me vëllain e saj 13-vjeçar Tristan dhe mikeshën më të mirë 16-vjeçare Emma Markin, testojnë dhe vlerësojnë të gjithë menunë e lokalit – nga pijet e ftohta dhe të ngrohta te petullat dhe ëmbëlsirat.

Për shumë ndjekës, videoja ishte një përzierje e hijshme mes humorit, autenticitetit dhe marketingut të zgjuar, duke e vlerësuar Kai-n për mënyrën e të sjellurit dhe qasjen argëtuese ndaj përmbajtjes.

Kur flasim për anëtarë të familjes Trump në zinxhirë ushqimorë të shpejtë, edhe vetë Donald Trump ka një precedent të ngjashëm: gjatë një ndalese në Filadelfia, ai shpërndau patate të skuqura në një pikë të McDonald’s për disa nga përkrahësit e tij, në kuadër të fushatës.