Një person është vrarë dhe 21 të tjerë janë plagosur pasi Rusia nisi një valë të madhe sulmesh me raketa dhe dronë në kryeqytetin ukrainas, Kiev.

Shpërthime u dëgjuan në të gjithë qytetin, me kryebashkiakun Vitali Klitschko që shkroi në Telegram se dëme janë raportuar në të gjitha lagjet, duke përfshirë ndërtesat e banimit dhe shkollën.

Një djalë 15-vjeçar ishte midis të plagosurve dhe 13 persona janë dërguar në spital, tre prej të cilëve në “gjendje të rëndë”, tha Klitschko, shkruan BBC.

Sulmet vijnë pas zotimit të Presidentit rus Vladimir Putin për t’u hakmarrë pasi akuzoi Ukrainën për kryerjen e një sulmi vdekjeprurës në një konvikt studentor në qytetin Starobilsk të premten, ku mbetën të vrarë 18 persona.

Në një deklaratë, Shtabi i Përgjithshëm i Forcave të Armatosura të Ukrainës tha se kreu një sulm pranë Starobilskut në Ukrainën lindore të pushtuar nga Rusia gjatë natës së të premtes, por pohon se goditi një njësi ushtarake ruse.