Shoqata për Mbrojtjen e Pacientëve e ka quajtur tendencë për ndërhyrje në proces të drejtësisë reagimin e Odës vetëm pak ditë para se ortopedit Visar Nushi t’i ngrihet aktakuzë. “Konsiderojmë se asnjë individ apo institucion nuk ka të drejtë ligjore dhe morale të ndërhyjë në punët e drejtësisë, duke mos përjashtuar as shoqatat apo odat”, ka thënë Besim Kodra, kryetar i Shoqatës për Mbrojtjen e Pacientëve

Ndërhyrje në proces hetimor e ka vlerësuar Shoqata për Mbrojtjen e Pacientëve reagimin e Odës së Mjekëve të Kosovës në lidhje me publikimin e artikullit, me titull “Konstatohet skandali i ortopedit kosovar”. Artikulli i botuar në “Zëri” për ekspertizën e kryer në Gjermani për vogëlushen N. Berisha e për rastin e së cilës tashmë Prokuroria ka ngritur aktakuzë ndaj ortopedit Visar Nushi ka ngjallur reagimin e Odës së Mjekëve.

Ndonëse në Kosovë është hezituar të kryhet një ekspertizë e mirëfilltë nga institucionet kompetente, duke u arsyetuar me mungesën e ekspertizës për fushën e ngushtë – trajtimin e skoliozës, reagimet e bëra nga Oda e Mjekëve kanë vënë në mbrojtje doktor Nushin.