Shpallja e konkursit nga Komuna e Prizrenit për punësimin e mësimdhënësve në fillim të kësaj jave ka ngjallur reagimin e opozitarëve, sikurse edhe të kandidatëve të pranuar në konkursin e shkuar që ishte anuluar nga organet komunale. Lidhur me këtë çështje, të mërkurën, ka reaguar edhe ish-drejtori i Arsimit, Gani Gërmizaj, duke theksuar në rrjetet sociale se deklaratat e kryetarit Mytaher Haskuka përmbajnë të pavërteta.

Ai ka shprehur qëndrimin se derisa ka qenë në pozitën e drejtorit ka pranuar kërkesat e shkollave fillore dhe të mesme për personel dhe se bazuar në to është shpallur konkursi në fillim të muajit korrik, në përputhje me dispozitat e Ligjit për arsimin parauniversitar, udhëzimet administrative, Ligjin e punës dhe normativit. Sipas tij, Haskuka është njoftuar vazhdimisht për konkursin dhe kërkesat nga shkollat për pozitat e lira në arsim. Në të njëjtën kohë ka shtuar se rishpallja e konkursit për mësimdhënës është shoqëruar me shkelje ligjore, shkruan sot Koha Ditore.

Shkeljet ligjore

“Anulimi i konkursit nga Haskuka është bërë duke u thirrur në Ligjin parauniversitar, ndërsa në konkursin e rishpallur nga ana e Zyrës Personelit – DKA-së përveçqë është i paligjshëm, nuk përmendet Ligji parauniversitar. Shihet se ka edhe shkelje të tjera ligjore, manipulime etj.”, ka shkruar ai. Gërmizaj ka bërë të ditur se kryetari Haskuka ka qenë i informuar për të gjitha problemet ekzistuese në DKA dhe se nuk i ka zgjidhur ato, por vetëm ka fajësuar nivelin qendror, dhe se “asnjëherë s’ka pasur një takim të vetëm qoftë me ministrin e Arsimit apo me atë të Financave për të gjetur një zgjidhje”.

Ish-zyrtari i lartë komunal ka akuzuar Haskukën se me vënien e theksit te DKA-ja po mundohet me i mbulua keqpërdorimet dhe punësimet e padrejta në drejtoritë e tjera. Në fund të reagimit, Gërmizaj ka shprehur bindjen se kryetari është përgjegjës për mijëra orë mësimore të humbura.