Kryetari i Partisë Demokratike të Kosovës, Kadri Veseli, ka mbajtur tubimin e radhës elektoral në Mitrovicë. Në palestrën “Minatori”, Veseli tha se Fillimi i Ri është garancë për një fuqizim të shtetit, për një afirmim të Kosovës në botë.
Ai përmendi para mitrovicasve se Fillimi i Ri është një koncept për zhvillim ekonomik dhe përkujdesje për kategoritë e shumta të shoqërisë. Në këtë frymë, ai ritheksoi premtimin për fokusim në mbështetje të bizneseve për rritje të prodhimit dhe hapje të vendeve të reja të punës.
Po ashtu, kreu i PDK-së premtoi edhe një herë rritje të pagave për sektorin publik. Veseli tha se qeverisja e ardhshme do t’ia rikthejë namin Trepçës.
Ai theksoi se me Fillimin e Ri s’do të lejohen më provokime nga Serbia drejt Kosovës. “Ka marrë fund Serbia këtu, s’ka më trena. Serbia më kurrë nuk do të kthehet”, tha ai.
I pari i PDK-së ritheksoi se do të ketë kthim të shqiptarëve në veri dhe investime në atë pjesë për të mundësuar një bashkëjetesë në paqe.
Veseli tha se duhet të ketë bashkim e jo ndasi mes njerëzve, sepse vetëm kështu mund të ketë zhvillim në të gjitha sektorët e jetës.