A ndiheni më të lumtur kur dita është me diell, ndërsa moti me shi ju ndikon në humor?

Një studim i fundit sugjeron se kohëzgjatja e dritës së ditës ka një ndikim të drejtpërdrejtë në gjendjen emocionale të njerëzve, madje më shumë sesa faktorë të tjerë si temperatura, ndotja e ajrit apo reshjet.

Studiuesit kanë zbuluar se njerëzit raportojnë nivele më të larta të shqetësimit mendor gjatë periudhave kur ditët janë më të shkurtra dhe ekspozimi ndaj dritës së diellit është më i kufizuar.

Sipas gjetjeve, nuk është vetëm sasia e rrezeve të diellit që marrim ajo që ndikon në humor, por veçanërisht kohëzgjatja e periudhës nga lindja deri në perëndimin e diellit.

Për të arritur në këto përfundime, ekipi hulumtues analizoi të dhëna meteorologjike nga universitete të ndryshme, si dhe informacione mbi cilësinë e ajrit dhe faktorë të tjerë mjedisorë. Rezultatet tregojnë se drita natyrale luan një rol të rëndësishëm në mirëqenien psikologjike të njerëzve.