Qindra punëtorë i janë bashkuar protestës së organizuar nga Sindikata e Bashkuar e Arsimit dhe Shkencës (SBShK), e mbështetur nga sindikata tjera, në Ditë e Punëtorëve, raporton Ekonomia Online.

Marshi protestues, që nisi nga Biblioteka Kombëtare e vazhdoi shesheve të Prishtinës, ndaloi para Qeverisë së Kosovës, ku kryesindikalistët mbajtën edhe fjalime.

Kryetari i SBAShK-ut, Rrahman Jasharaj, kërkoi nga Qeveria që të veprojë sa më shpejt për t’u mos përsëritur viti 2022, kur u mbajt grevë disamuajshe.

“Qeveria vazhdon t’i ikë dialogut dhe prandaj jemi këtu drejtuar Qeverisë qe t’i realizojë kërkesat tona për t’i parandaluar veprimet tjera sindikale. Kërkojmë nga Qeveria që të veprojë e te mos përsëritet viti 2022 që shkaku i heshtjes së tyre na u deshtë të bëjmë veprime sindikale që nuk i kemi dashur”, tha ai.

Kryetari i Sindikatës së Pavarur të Sektorit Privat, Jusuf Azemi, tha se kryeministri Albin Kurti i ka gënjyer punëtorët kur ka deklaruar se do t’i rrisë pagat. Me këtë rast, Azemi ka përmendur edhe ndërtimin e shtëpive në Graçanicë për komunitetin serb, duke thënë se “atje ndërtohen soliterat, e ne nuk kemi një shujtë”.

“Ne mendojmë se kjo qeveri edhe ka kryer punë nuk është se ka kryer por ka kryer punë qysh se dje ndertoj solitera për të tjerët nuk jemi kundër, por deri sa atje ndërtohen soliterat ne nuk kemi një shujtë. Kryeministri i Kosovës i shpenzon rezervat shtetërore, kryeministri i Kosovës paguan njerëz nga 7 mijë euro nga ambasadat tjera dhe neve nuk na jep as 7 cent. Qeveria me politikat e veta e ka mbyt kapitalin e Kosovës, nëse vazhdon kështu, kryeministrin e Kosovës nuk ka kush të bart me xhipa të zi, se Kosova po zbrazet. Këta njerëz që po dalin, po dalin sepse paga është 170 euro, neve na ka rrejt se ne momentin kur vjen në Qeveri, paga do të jetë 350 euro dhe sot ajo është 170 euro”, tha Azemi.

E kryetari i Bashkimit të Sindikatave të Pavarura të Kosovës, Atdhe Hykolli, tha se prania e tyre në masë të madhe, tregon për fuqinë që e kanë. Ai i bëri ftesë ekzekutivit që të angazhohet për dialog me sindikatat.

“Prania jonë këtu është dëshmi e besimit tonë në fuqinë e dialogut dhe angazhimit konstruktiv. Jemi mbledhur për të nxitur mirëkuptim për hapa të mëtutjeshëm. Qeverisë i bëjmë ftesë të hapur për tu angazhuar për dialog. Kërkesat tona lindin nga një dëshirë e përbashkët për punëtorët e arsimit, sektorit privat, dhe gjithë punëtoret në Kosovë”, tha Hykolli.

E kryetari i SBAShK-ut në Klinë, Arif Elezi, prezantoi kërkesat e tyre, duke kërkuar dialog social nga qeveria për realizimin e kërkesave, konsultime para plotësimit të ligjeve, nënshkrimin e kontratës kolektive, ngritjen e vlerës së koeficientit të pagave, përmirësimin e kushteve të punës, norma javore të jetë 18 orë e disa kërkesa të tjera.

“Duam dialog social për realizimin e kërkesave tona, nuk lejojmë të bëhen ndryshime të ligjeve në dëm të punëtorëve të arsimit, kërkojmë nënshkrimin e aneks Kontratës Kolektive të Arsimit sidomos për ruajtjen e vendeve të punës, Qeveri respekto pensionistët sepse ju arsimuan edhe juve, kërkojmë urgjentisht të ngritët vlera e koeficientit të pagave për se paku 30%, kërkojmë përmirësimin e kushteve të punës në institucionet arsimore, plotësimi i Ligjeve të mos bëhet pa pajtimin e sindikatave, duam funksionalizimin e Këshillit Ekonomik Social, kërkojmë që norma javore të jetë 18 orë si në shtetet e rajonit, Qeveria të sigurojë buxhet për zbatimin e Kontratës Kolektive të Arsimit pa pasur nevojë të shkohet në gjykata, kërkojmë të kemi përfaqësues të punëtorëve në komisione e borde në të cilat vendoset për çështjet jetike për punëtorët”.