Fondi amerikan RedBird Capital, pronar i Milanit, është në bisedime me fondin sovran saudit PIF për të marrë kontrollin e Al Nassr, klubit ku aktivizohet Cristiano Ronaldo.

Sipas raportimeve të “Semafor”, negociatat janë ende në fazën fillestare dhe nuk ka garanci se do të arrihet marrëveshja, përcjell “Gazeta Express”.

Megjithatë, palët thuhet se kanë zhvilluar të paktën dy takime për të diskutuar mundësinë e blerjes së shumicës së aksioneve të klubit saudit.

RedBird i synon 70 për qind të aksioneve

Sipas planit që po shqyrtohet, RedBird dhe partnerët e saj do të investonin rreth një miliard rialë sauditë, që korrespondojnë me afërsisht 267 milionë dollarë, për të marrë 70 për qind të aksioneve të Al Nassr.

Në strukturën e re të pronësisë, Cristiano Ronaldo pritet të ketë një pjesëmarrje prej 20 për qind. Në projekt mund të përfshihet edhe Saudi Media Company, kompani private me seli në Riad, e cila operon në sektorët e medias, sportit dhe argëtimit.

Nëse marrëveshja realizohet, Ronaldo nuk do të ishte vetëm ylli kryesor i skuadrës, por edhe një nga bashkëpronarët e saj.

PIF po e përgatit klubin për shitje

Përpara një shitjeje të mundshme, Fondi i Investimeve Publike të Arabisë Saudite (PIF) po punon për përmirësimin e gjendjes financiare të Al Nassr.

Sipas raportimeve, klubi ka detyrime prej rreth 800 milionë rialësh, ose 213 milionë dollarësh.

PIF po shqyrton marrëveshje të reja sponsorizimi përmes kompanive të portofolit të tij, me synimin për të përmirësuar bilancin financiar të klubit dhe për të lehtësuar procesin e shitjes.

Për Gerry Cardinale, pronarin e RedBird, blerja e Al Nassr do të përfaqësonte një zgjerim të investimeve të tij në futbollin ndërkombëtar dhe do ta afronte më shumë me Cristiano Ronaldon, një prej sportistëve më të fuqishëm në aspektin komercial.

Megjithatë, deri tani nuk ka marrëveshje përfundimtare dhe kushtet e operacionit mund të ndryshojnë gjatë negociatave.