Sindikata e Bashkuar e Arsimit, Shkencës dhe Kulturës (SBAShK) paralajmëron sërish greva në të gjitha institucionet e arsimit në vend. Një grevë dyorëshe do të mbahet të martën, në dy orët e para të mësimit të paradites dhe në dy orët e para të mësimit të pasdites në të gjitha shkollat e Kosovës, kurse universitetet do të jenë në grevë nga ora 10:00 deri në orën 12:00, thuhet në njoftimin e kësaj sindikate.

SBASHK-u thotë se e merr këtë hap duke e e parë se pas grevës njëorëshe në tërë sistemin arsimor, kishte reflektim të pamjaftueshëm të Qeverisë së Kosovës ndaj kërkesave të të punësuarve në arsimin e Kosovës. Andaj, SBAShK-u thotë se do të vazhdojë me veprimet sindikale, ashtu si është vendosur në mbledhjen e jashtëzakonshme të Këshillit Drejtues.

“Këshillat greviste, që janë formuar me kohë, në shkolla e njësi akademike do të kujdesën për mirëvajtjen e grevës dyorëshe dhe do t’i mbajnë të informuar këshillat greviste komunale, gjegjësisht Këshillin Grevist të Universiteteve, kurse këta këshilla do të jenë në komunikim me Këshillin Qendror Grevist që është në selinë e SBASHK-ut”.

“Përkundër vlerësimit të gabueshëm të apelit tonë drejtuar prindërve nga ana e KMDLNj-së dhe ca individëve, edhe sot u drejtohemi prindërve e nxënësve me apel, jo për t’u bërë pjesë e grevës sonë, por për hir të sigurisë së nxënësve të mos nisen për në shkolla gjatë kohës sa zgjatë greva, por të jenë në institucionet shkollore për të nisur mësimin në orën e tretë sipas orarit. JU kujtojmë se kur ka grevë nuk ka mësim”, thuhet në komunikatë.