53 mijë e 338 votues janë larguar deri tash nga lista votuese për zgjedhjet e 11 qershorit, raporton KTV.

Numri është për 26 mijë e 134 persona më shumë sesa KQZ-ja kishte arritur t’i largonte nga lista në zgjedhjet e fundit.

Nga lista është larguar edhe një numër i konsiderueshëm i atyre që kanë hequr dorë nga shtetësia e Kosovës, gjithsej 19 mijë e 796.

Pastrimi i listave ka qenë problem i vazhdueshëm në zgjedhjet në Kosovë.

Parti të ndryshme kanë shfrytëzuar emrat e atyre që kanë vdekur e janë gjendur në lista, duke votuar në emër të tyre.

Në këtë vit pritet që të votojnë edhe shumë votues të rinj ose 118 mijë e 313 persona. Që dikush të largohet nga lista votuese, familja duhet që gjithsesi t’i raportojë në institucione familjarët e vdekur.

Lista preliminare e votuesve është 1 milion e 885 mijë e 147 votues. Ajo do të certifikohet nga KQZ-ja më 1 qershor.