Në përballjen mes Flamurtarit dhe Luftëtarit në Kategorinë Superiore të Shqipërisë është shfaqur një pankartë në përkrahje të presidentit të Kosovës, Hashim Thaçit, pas aktakuzës ndaj tij nga Prokuroria Speciale e Hagës.
Sot po zhvillohen dy ndeshje në kuadër të ligës elitare të futbollit në Shqipëri. Megjithatë, ajo mes Flamurtarit dhe Luftëtarit ka marrë më shumë vëmendje në rrjete sociale, shkaku i një mesazhi të shfaqur në tribuna për presidentin Hashim Thaçi.
“Hashim Thaçi – Vlora krenohet me ty”, shkruhet në pankartën e shfaqur në stadium.
Më 24 qershor, Prokuroria Speciale e Hagës e publikoi aktakuzën që ia ka dërguar për shqyrtim gjyqtarit të procedurës paraprake.
Në aktakuzën 10 pikëshe, gjithmonë sipas pretendimeve të Prokurorisë Speciale, Thaçi dhe kryetari i PDK-së Kadri Veseli janë të dyshuar për krime të ndryshme dhe për rreth 100 vrasje. /Gazeta Express/