Netanyahu telefonon çdo ditë Trump-in për ta bindur të rifillojë luftën kundër Iranit

“Netanyahu e telefonon çdo ditë për ta nxitur të rifillojë luftën”, i tha gazetës një person i informuar për diskutimet mes tyre.

Ai tha se zyrtarë brenda dhe jashtë Shtëpisë së Bardhë, të cilët kundërshtojnë rifillimin e luftimeve, po përpiqen të kundërpeshojnë presionin e Netanyahu-t për rikthimin e luftës.

“Udhëheqësit rajonalë po i kërkojnë atij (Trump-it) të mos e përshkallëzojë situatën dhe t’u japë përparësi negociatave”, tha burimi.

Një tjetër person i njohur me situatën në Izrael deklaroi se Netanyahu dëshiron rifillimin e veprimeve ushtarake kundër Iranit, por aktualisht nuk ka një përpjekje të koordinuar për të bindur Trump-in.

Sipas Financial Times, udhëheqësit arabë dhe myslimanë janë alarmuar nga lobimi i vazhdueshëm i Netanyahut për rifillimin e luftës kundër Iranit.

Të hënën, Trump deklaroi se aleatët e SHBA-së në Gjirin Persik janë kundër një fushate të re ushtarake kundër Teheranit.

Netanyahu, i cili vijon të jetë kryeministër në detyrë pas zgjedhjeve të muajit të kaluar në Izrael, të cilat nuk prodhuan një rezultat përfundimtar, ka bërë thirrje për rifillimin e sulmeve të përbashkëta amerikano-izraelite, me synimin për të rrëzuar qeverinë iraniane.

Trump, megjithatë, deklaroi se ka “zhvillime pozitive” drejt përfundimit të luftës gati nëntëmujore dhe se rifillimi i sulmeve amerikane ndaj Iranit tashmë duket “shumë pak i mundshëm”.