Luka Modric do të vazhdojë me Milanin edhe për një sezon

Luka Modrić do të vazhdojë të jetë pjesë e Milanit, pasi ka arritur marrëveshje verbale për rinovimin e kontratës afatshkurtër me klubin italian.

Legjenda kroate, fitues i Topit të Artë, ka vendosur të mos i japë fund karrierës, por të vazhdojë të kontribuojë te kuqezinjtë edhe për të paktën një sezon tjetër.

Sipas ekspertit të transferimeve, Fabrizio Romano, 40-vjeçari i ka dhënë dritën jeshile Milanit pas një bisede direkte me trajnerin e ri, Ruben Amorim.

“Luka Modrić ka arritur marrëveshje verbale për të nënshkruar kontratë të re me Milanin. Legjenda kroate do të vazhdojë karrierën dhe nuk do të pensionohet, pasi i ka dhënë miratimin zyrtar klubit. Modrić do të nënshkruajë së shpejti kontratën e re afatshkurtër me Milanin. Ai ka biseduar edhe me Ruben Amorimin”, ka shkruar Romano.

Ky rinovim vjen pas një sezoni të suksesshëm debutues me Milanin në edicionin 2025/26, ku Modrić ishte një nga lojtarët më të rëndësishëm të skuadrës në Serie A, duke kontribuar me gola dhe asistime pavarësisht moshës.

Modrić iu bashkua Milanit si lojtar i lirë në verën e vitit 2025, pasi mbylli një periudhë të jashtëzakonshme 13-vjeçare te Real Madridi.

Mesfushori kroat u përshtat shpejt me futbollin italian, duke ndihmuar Milanin të luftojë në krye të renditjes dhe duke marrë vlerësime të shumta për profesionalizmin dhe qëndrueshmërinë e tij.

Vendimi i tij për të vazhduar karrierën nuk ka befasuar ata që e njohin, pasi Modrić ka dëshmuar vazhdimisht se është në gjendje të sfidojë kufijtë që zakonisht vendos mosha në futboll.