Udhëheqësit e Francës dhe Kanadasë u zotuan të dielën për lidhje më të ngushta për t’u përballur me tensionet në rritje gjeopolitike, ndryshimet klimatike dhe erozionin e vlerave demokratike, pasi u takuan në territorin francez të Saint-Pierre dhe Miquelon pranë bregdetit Atlantik të Kanadasë.

Vizita e dy udhëheqësve në territor, e para e një presidenti francez që nga viti 2014 dhe e para nga një kryeministër kanadez, erdhi vetëm disa javë pasi Presidenti i SHBA-së Donald Trump postoi një imazh që tregonte ishujt, si dhe të gjithë Kanadanë dhe vendet e tjera në Amerikën e Veriut, të mbuluara nga flamuri amerikan.

Ottaëa ka kërkuar lidhje më të ngushta me Bashkimin Evropian në mes të një lufte tregtare gjithnjë e më të ashpër me Shtetet e Bashkuara.

“Shoqëritë tona po tronditen nga stuhi të reja: trazirat e shkaktuara nga ndryshimet klimatike, erozioni i normave demokratike dhe kërcënimet e reja ndaj sovranitetit tonë. Ka ardhur koha për të forcuar lidhjet tona”, tha Carney në një deklaratë së bashku me Macron.

Macron shtoi se të dy aleatët ranë dakord të krijojnë lidhje më të ngushta në sektorë që variojnë nga hapësira dhe klima deri te energjia.

“Ne të dy besojmë në demokraci, sundimin e ligjit, respektin për të drejtën ndërkombëtare, respektin për tregtinë e lirë dhe të ndershme, shkencën si bazë për vendimet tona dhe autonominë strategjike që ne mbrojmë”, tha ai.

Diplomatët thanë se vizita e Macronkishte një peshë simbolike pas postimit të Trump në mediat sociale.

Imazhi që Trump ndau tregonte flamurin amerikan të varur mbi një hartë të Shteteve të Bashkuara, Kanadasë, Groenlandës, Islandës, Meksikës, Amerikës Qendrore dhe Karaibeve, dhe ishte etiketuar “Shtetet e Bashkuara të Amerikës”. Ai përfshinte Saint-Pierre dhe Miquelon dhe territoret franceze të Karaibeve.

Duke iu përgjigjur pyetjeve mbi postimin e Trump, Macron hodhi poshtë çdo ide se territoret nuk mund të ishin franceze dhe tha se nuk kishte nevojë ta riafirmonte këtë pikë çdo ditë vetëm sepse “njerëzit kanë ide të çuditshme ose thonë gjëra të çuditshme”.

Për Francën, Saint-Pierre dhe Miquelon është një territor strategjikisht i rëndësishëm për shkak të vendndodhjes së tij pranë SHBA-së dhe Arktikut.

Territori zë gjithashtu një vend kyç në bashkëpunimin e Francës me Kanadanë, përfshirë edhe në fushën e energjisë.

Macron, qeveria e të cilit po përballet me presion në rritje në vend për shkak të rritjes së çmimeve të karburantit, tha se bisedimet kishin hapur derën për diskutime dypalëshe që synonin nënshkrimin e marrëveshjeve konkrete. Parisi shpreson që Kanadaja do të zgjerojë eksportet e gazit natyror të lëngshëm në Evropë dhe jo kryesisht në Azi.

“Projektet kanadeze të gazit natyror të lëngshëm mund të ndihmojnë. Ato janë të rëndësishme për Evropën”, tha Macron.

Të dy udhëheqësit diskutuan gjithashtu marrëdhënien e Kanadasë me BE-në, pasi blloku i hapi derën Otavës për t’u bërë anëtarja e saj e parë e asociuar, diçka që Macron tha se Franca e mbështet.

Megjithatë, çdo lëvizje drejt një integrimi më të thellë ka të ngjarë të përballet me pengesa. Më shumë se një dekadë pasi BE-ja dhe Kanadaja ranë dakord për Marrëveshjen Gjithëpërfshirëse Ekonomike dhe Tregtare, dhe nëntë vjet pasi filloi zbatimi i saj i përkohshëm, disa shtete anëtare të BE-së ende nuk e kanë ratifikuar marrëveshjen, përfshirë Francën.