Turqia po rrit prodhimin e kanabisit në të gjithë vendin për të përmirësuar ekonominë e vendit.

Kultivimi i drogës në Turqi u ndalua gjatë dekadave të fundit për shkak të rregullave anti-narkotike.

Megjithatë, presidenti turk Rexhep Tajip Erdogan tha së fundmi se synon të rifillojë dhe të inkurajojë prodhimin e tij për përdorim industrial.

Për dekada me radhë, Turqia ka luftuar për të çrrënjosur Partinë e Punëtorëve të Kurdistanit (PKK), që është konsideruar një grup terrorist i përfshirë në prodhimin dhe trafikimin e drogës për të financuar aktivitetet e tij.

Turqia, e cila përdoret si rrugë për trafikimin e drogës nga Lindja në vendet evropiane, ka legjislacion shumë të rreptë për përdorimin e drogës, prodhimin dhe trafikimin e saj.

Erdogan njoftoi se dëshiron të zgjerojë prodhimin në mënyrë të ligjshme të kanabisit, duke theksuar se ndalimi i prodhimit të saj është një komplot nga fuqitë perëndimore për të minuar bujqësinë turke, transmeton oranews.

“Armiqtë e Turqisë, të cilët pretendojnë se janë miqtë tanë, detyruan Turqinë t’i japë fund prodhimit të kanabisit,”-tha ai duke iu referuar aleatit të tij në NATO, SHBA-ve, që e detyruan Turqinë të mos prodhonte lulëkuqe të opiumit në vitin 1971.

Në atë kohë, Turqia ishte prodhuesi kryesor i opiumit ligjor, por fermerët prodhonin edhe sasi të konsiderueshme në mënyrë të paligjshme.

Turqia madje ka një krahinë anatoliane të quajtur Afyon, që do të thotë “opium” në turqisht, i njohur në gjeneratat e mëparshme si një prodhues i madh i lulëkuqes.

Ministri turk i bujqësisë dhe pylltarisë Bekir Pakdemirli njoftoi gjithashtu se qeveria do të ndërmarrë hapa për rritjen e prodhimit të kanabisit, që deri tani është e lejuar vetëm në 19 nga 81 krahinat e Turqisë.

Kanabisi vjen nga Azia qendrore, ku bima është përdorur për 8.000 vjet. Rajoni është gjithashtu atdheu origjinal i popullit turk.

Përdorimi i gjerë i kanabisit industrial e bën atë një produkt shumë tërheqës bujqësor për shumë vende, përfshirë Turqinë.