Instituti i Prishtinës për Studime Politike (PIPS) ka publikuar anketën vjetore Politika Ndërkombëtare dhe Dialogu Kosovë-Serbi: Perceptimet e qytetarëve të Kosovës.

Në raportin e PIPS thuhet se vetëm rreth 3% të respondentëve kanë deklaruar se janë shumë të informuar për përmbajtjen e Marrëveshjes për Normalizim Ekonomik mes Kosovës dhe Serbisë, të nënshkruar në Shtëpinë e Bardhë me 4 Shtator.

Ndërsa, vetëm rreth 1% kanë deklaruar se Marrëveshja e Washingtonit i ka përmbushur tërësisht pritshmëritë e tyre paraprake.

Disa prej gjetjeve kryesore:

Vetëm rreth 3% të respondentëve kanë deklaruar se janë shumë të informuar për përmbajtjen e Marrëveshjes për Normalizim Ekonomik mes Kosovës dhe Serbisë, të nënshkruar në Shtëpinë e Bardhë me 4 Shtator;

Të pyetur se sa përfiton Kosova nga zbatimi i ‘Mini-shengenit’ rajonal, rreth 29% janë përgjigjur me ‘pak’, ndërkaq rreth 22% janë përgjigjur me ‘aspak’;

Vetëm rreth 1% kanë deklaruar se Marrëveshja e Washingtonit i ka përmbushur tërësisht pritshmëritë e tyre paraprake;

Shumica e respondentëve, rreth 34%, besojnë se Kosova do të anëtarësohet në BE deri në vitin 2025;

Rreth 63% nuk besojnë se një marrëveshje për normalizimin e marrëdhënieve mes Kosovës dhe Serbisë do të arrinte të përmirësonte jetën e tyre;

Shumica e të anketuarve, rreth 46% kanë deklaruar se nuk besojnë se dialogu mes Kosovës dhe Serbisë, që po zhvilllohet në Bruksel nën lehtësimin e BE, do të përfundojë me marrëveshje finale mes shteteve;

Shumica e respondentëve janë deklaruar kundër themelimit të Asociacionit të Komunave me shumicë serbe, qoftë me kompetenca ekzekutive (rreth 85%), qoftë si organizatë joqeveritare (rreth 55%);

Në anën tjetër, shumica e komunitetit serb beson se themelimi i Asociacionit të Komunave me shumicë serbe nuk paraqet rrezik për Kosovën;

Rreth 72% janë deklaruar se nuk vlerësojnë se ekzistenca e Kosovës si shtet në planin afatgjatë rrezikohet si pasojë e mosnjohjes nga Serbia

Liderja e preferuar botërore qytetarëve kosovarë është Kancelarja e Gjermanisë, Angela Merkel me rreth 66%;

Presidenti i Turqisë, Rexhep Tayyip Erdogan renditet si lideri i dytë botëror i preferuar, me rreth 14%;

Presidenti amerikan Donald Trump është renditur në pozitën e tretë si lideri më i preferuar, me rreth 9%;

Brenda komunitetit serb lideri i preferuar është dukshëm Presidenti rus Vladimir Putin, me rreth 74%;

SHBA konsiderohen si partneri kryesor i Kosovës në arenën ndërkombëtare;

Rreth 70% vlerësojnë se NATO është organizata ndërkombëtare që i ka ndihmuar Kosovës më së shumti nga viti 1999, duke lënë prapa BE-në me rreth 9%.