Presidenti i Serbisë, Aleksandër Vuçiq, ka publikuar një fotografi nga Tirana, ku nesër do të mbahet samiti BE-Ballkani Perëndimor.

Fotografia është nga darka para samitit, dhe bashkë me Vuçiqin janë edhe kryeministri i Shqipërisë, Edi Rama, si dhe me komisioneri evropian për Fqinjësi dhe Zgjerim, Oliver Varhelyi dhe Gert Jan Koopman, drejtor i përgjithshëm i grupit negociator të KE për Fqinjësinë dhe Zgjerimin.

Vuçiq ka shkruar se janë mbledhur për tema që sipas tij janë jetike për Ballkanin Perëndimor.

Ai ka përmendur “lidhejn e ekonomive dhe heqjen e barrierave”.

“Ne jemi mbledhur këtu për të diskutuar tema që janë me rëndësi jetike për Ballkanin Perëndimor. Lidhja e ekonomive, heqja e barrierave dhe përparimi drejt një tregu të vetëm janë synimet kryesore që çojnë në zhvillimin thelbësor të vendit dhe rajonit tonë dhe një të ardhme më të mirë për të gjithë qytetarët tanë”, ka shkruar Vuçiq.

Kryeministri i Kosovës, Albin Kurti, nuk do të marrë pjesë në samit, për arsye që nuk janë bërë të ditura nga Qeveria e Kosovës.