Milan ka njoftuar zyrtarisht nënshkrimin lojtarit anglez, Kyle Walker, në huazim nga kampioni i Premier League, Manchester City, deri në fund të sezonit 2024-25. 

“Rossonerët” e kanë marrë Walker në huazim falas dhe do të kenë mundësinë ta bëjnë marrëveshjen të përhershme për një shumë prej 5 milionë eurosh në një moment të mëvonshëm. 

Sipas raportimeve nga disa media gjatë javës së kaluar, tashmë ka një marrëveshje për një kontratë deri në fund të sezonit 2026-27, me pagw rreth 4.5 milionë euro në vit. 

Ai do të veshë fanellën me numrin 32 gjatë sezonit të tij të parë në Serie A. 

Ish-lojtari i kombëtares së Anglisë, i cili ka 93 ndeshje ndërkombëtare, ishte nën kontratë me Manchester City deri në verën e vitit 2026, por e informoi Pep Guardiola dhe klubin në fillim të dritares së transferimeve se dëshironte të largohej për të përjetuar lojën jashtë vendit para se të përfundojë karrierën e tij si lojtar. 

Ka pasur interesim të raportuar nga Liga Profesionale e Arabisë Saudite, por “Rossonerët” arritën të mposhtin konkurrencën për ta sjellë atë në “San Siro”. 

Ai fluturoi drejt Milanit të enjten për kontrollet mjekësore dhe nënshkrimin e kontratës, dhe që nga ajo kohë ka përfunduar formalitetet e nevojshme për të realizuar kalimin e tij te “Rossonerët”. 

Ai bëhet nënshkrimi i parë i Milanit në dritaren e transferimeve të janarit. 

Megjithëse transferimi i tij është njoftuar zyrtarisht, pritet që ai të mos jetë i gatshëm në kohë për të luajtur në ndeshjen e ardhshme të ligës të Milanit kundër Parmës në Serie A të dielën. 

Sergio Conceicao aktualisht ka katër mbrojtës të djathtë në skuadër, me Walker, Emerson Royal, Davide Calabria dhe Alessandro Florenzi. 

Megjithatë, pritet që Emerson Royal të jetë jashtë për rreth dy muaj pasi u dëmtua disa minuta pas hyrjes në fushë në fitoren 1-0 të skuadrës ndaj Gironës të mërkurën, gjë që ka shkatërruar ndoshta mundësitë e tij për t’u larguar nga klubi në janar. 

Kapiteni Calabria është në fund të kontratës në verë dhe nuk duket se ka mundësi për rinovim siç janë gjërat tani. E njëjta situatë vlen edhe për Florenzin, i cili nuk ka luajtur asnjë minutë me ekipin e parë në sezonin 2024-25.