Operacioni policor i koduar “Catch” ka çuar në kapjen e katër shtetasve të shpallur në kërkim. Njëri prej tyre ishte i kërkuar në kuadër të megaoperacionit antidrogë “Blic 34”.

Sipas informacioneve nga Policia e Tiranës, Seksioni për Hetimin e Narkotikëve ka ndaluar shtetasin M. B., 25 vjeç, për veprën penale “Prodhimi dhe shitja e narkotikëve”. Gjykata e Tiranës kishte caktuar masën e sigurisë “Arrest në burg” për të.

Gjithashtu, Komisariati i Policisë Nr. 1 ka ndaluar Q. K., 49 vjeç, i cili kishte mbetur për të vuajtur 1 vit e 5 muaj burgim për “Plagosjen e rëndë me dashje”, vendosur nga Gjykata e Vlorës.

Në operacionin e zhvilluar nga Komisariati i Policisë Nr. 3, u kap dhe E. G., 22 vjeç, i dënuar me 8 muaj burgim për “Vjedhjen” e kryer në bashkëpunim.

Komisariati i Policisë Nr. 4 ndaloi po ashtu A. H., 52 vjeç, i cili gjithashtu kishte marrë masën “Arrest në burg” për “dhunë në familje”.

Materialet procedurale do t’i referohen Prokurorisë së Tiranës për veprime të mëtejshme. Operacioni “Catch” vazhdon të mbetet aktiv për të garantuar rendin dhe sigurinë në kryeqytet.