Marina e Korpusit të Gardës Revolucionare të Iranit thotë se Ngushtica e Hormuzit është e mbyllur për të gjitha anijet, duke përmendur shkelje të armëpushimit nga SHBA-ja dhe Izraeli.

Marina lëshoi një paralajmërim të rreptë për të gjitha anijet: “Mos iu afroni Ngushticës së Hormuzit, përndryshe siguria juaj do të vihet në rrezik.”

Komanda ushtarake e Iranit deklaroi se po e mbyll Ngushticën e Hormuzit për shkak të shkeljeve “të vazhdueshme” të armëpushimit në Liban nga Izraeli dhe për shkak se Shtetet e Bashkuara “nuk kanë zbatuar” pikën e parë të marrëveshjes së përkohshme për përfundimin e luftës, raportuan të shtunën mediat shtetërore iraniane, transmeton BBC.

“Duke pasur parasysh mungesën e vullnetit të mirë nga ana e Shteteve të Bashkuara dhe shkeljen e qartë të angazhimeve të tyre përmes moszbatimit të nenit të parë të memorandumit për përfundimin e luftës, si dhe në përgjigje të shkeljes së vazhdueshme dhe të pandërprerë të armëpushimit nga regjimi sionist në jug të Libanit… Kjo shpall se Ngushtica e Hormuzit do të mbyllet për kalimin e anijeve,” thuhet në një deklaratë të Komandës Qendrore Khatam al-Anbiya, organi më i lartë i komandës së përbashkët ushtarake të Iranit.