Profesori në Universitetin Johns Hopkins, Daniel Serwer shkroi se “gjërat mund të ishin më mirë në Kosovë”, pas një vizite në vendin e vogël ballkanik.

Ai shkroi se Kosova “mund të kishte një qeveri me kompetenca të plota që nuk blen vota”.

“Popullsia do të gëzonte rritje më të shpejtë ekonomike dhe më shumë infrastrukturë publike. Vendi mund të ishte më i suksesshëm në promovimin e mirëkuptimit dhe bashkëpunimit mes serbëve dhe shqiptarëve. Politikanët e tij mund të bashkëpunonin për të ofruar shërbimet më të mira të mundshme për qytetarët. Ish-metropoli i tij, Beogradi, mund të ishte më pak armiqësor”, shkruan ai në web-faqen e tij.

Por, ai megjithatë thotë se “gjërat janë përmirësuar ndjeshëm krahasuar me të kaluarën dhe ka perspektiva për përmirësime të mëtejshme në të ardhmen”.

“Hapi jetik i radhës është anëtarësimi në NATO, për të cilin Forca e Sigurisë së Kosovës do të jetë e gatshme në vitin 2028. Amerikanëve do t’u duhet t’i bindin katër anëtarët e NATO-s që ende nuk e njohin Kosovën ta pranojnë atë. Anëtarësimi në Bashkimin Europian nuk duhet të vonojë shumë pas kësaj, me kusht që qeveria e ardhshme të bëjë një përpjekje të koordinuar për të zbatuar legjislacionin në përputhje me BE-në, të cilin Kuvendi tashmë e miraton”, shkruan ai.

Me anëtarësimin në NATO dhe në BE, Serwer thotë se “Kosovës nuk do t’i bëjë shumë përshtypje mungesa e anëtarësimit në OKB, gjë që nuk do të ndodhë derisa Rusia dhe Serbia të përjetojnë një ringjallje demokratike, e cila sot është e vështirë të imagjinohet”.