Tetë vende të BE-së bllokojnë hapjen e një kapitulli të ri negociues për Serbinë.

Ambasadorët e Bashkimit Evropian nuk kanë arritur konsensus për hapjen e një grupi të ri negociues me Serbinë në kuadër të procesit të anëtarësimit në BE.

Sipas mediumit, tetë nga 27 shtetet anëtare kundërshtuan hapjen e Grupit 3, i cili lidhet me konkurrueshmërinë dhe rritjen gjithëpërfshirëse. Kundër ishin Holanda, Suedia, Finlanda, Belgjika, Estonia, Lituania, Bullgaria dhe Kroacia.

Ndërkohë, Danimarka, Luksemburgu dhe Letonia nuk dhanë mbështetje të plotë, ndërsa vende si Franca vazhdojnë ta mbështesin avancimin e Serbisë në procesin e integrimit evropian.

Sipas Euronews, shtetet që kundërshtuan shprehën shqetësime për sundimin e ligjit në Serbi dhe mospërputhjen e Beogradit me politikën e sanksioneve të BE-së ndaj Rusisë.

Nga ana tjetër, Komisioni Evropian u kishte dërguar vendeve anëtare një dokument ku vlerësonte se Serbia ka bërë përparim në disa fusha, përfshirë reformën në drejtësi, lirinë e mediave, kuadrin zgjedhor dhe bashkëpunimin në politikën e jashtme dhe të sigurisë.

Megjithatë, Komisioni kishte theksuar se nevojiten ende reforma të mëtejshme, veçanërisht në sistemin gjyqësor dhe atë prokurorial.

Serbia aplikoi për anëtarësim në Bashkimin Evropian në vitin 2009 dhe mori statusin e vendit kandidat në vitin 2012. Deri më tani janë hapur 22 kapituj negociues, ndërsa dy janë mbyllur përkohësisht.

Për hapjen ose mbylljen e çdo grupi negociues kërkohet miratimi unanim i të 27 shteteve anëtare të Bashkimit Evropian.