Ambasada e Shteteve të Bashkuara të Amerikës në Prishtinë ka konfirmuar gatishmërinë e saj për të vazhduar bashkëpunimin me institucionet kryesore të vendit, Qeverinë dhe Kuvendin e Kosovës, në funksion të shtyrjes përpara të prioriteteve të përbashkëta.

Përmes një komunikate zyrtare, selia diplomatike amerikane ka theksuar se në thelb të këtij partneriteti mbeten siguria, zhvillimi dhe ruajtja e stabilitetit në tërë rajonin.

“Ambasada e SHBA-së pret me padurim të punojë me Qeverinë dhe Kuvendin për të avancuar prioritetet e përbashkëta, përfshirë paqen rajonale, stabilitetin dhe prosperitetin e ndërsjellë”, thuhet në deklaratën e ambasadës.

Deklarata e Ambasadës vjen në kohën kur pritet të nis mbledhja e Kryesisë së Kuvendit, e para në këtë legjislaturë.

Shtetet e Bashkuara mbeten aleati kryesor strategjik i Kosovës, duke ofruar mbështetje të vazhdueshme në proceset e integrimit, fuqizimit të institucioneve demokratike dhe sigurisë në Ballkanin Perëndimor.

The U.S. Embassy looks forward to working with the government and assembly to advance shared priorities, including regional peace, stability, and mutual prosperity. https://t.co/kbTVoSythp

— U.S. Embassy Pristina (@USEmbPristina) September 25, 2026