Raporti i BE-së konstatoi ngecje, deputetja e LVV-së: Përparimi është i pamohueshëm

Pavarësisht se raporti në masë të madhe konstaton se s’është bërë progres, Gashi tha se përparimi është “i pamohueshëm”.

“Për ne si grup parlamentar i Lëvizjes Vetëvendosje, së bashku me aleatët tanë, ky debat parlamentar po ashtu është një mundësi e mirë për të prezantuar sukseset dhe përparimin e pamohueshëm të Republikës së Kosovës në rrugëtimin e Bashkimit Evropian”, tha ajo.

Gashi tha se “integrimi evropian mbetet orientimi strategjik”, ndërsa përmendi liberalizimin e vizave në vitin 2024 si sukses të Qeverisë së udhëhequr nga LVV-ja.

“Gjatë kësaj dekade, kemi përafruar legjislacionin me standardet evropiane, kemi zgjeruar marrëdhëniet tregtare, por mbi të gjitha, kemi liberalizuar vizat për vendin tonë”, tha ajo.

“Sot, çdo qytetar i Republikës së Kosovës mund të lëvizë lirshëm në çdo cep të bllokur Schengen, por edhe më gjerë”, shtoi deputetja.

Gashi tha se “mosshqyrtimi i aplikimit të Kosovës (për anëtarësim në BE) nuk është vetëm vonesë për Kosovën, por në fakt është edhe një sfidë për besueshmërinë e zgjerimit të Bashkimit Evropian”.

Deputetja përmendi “bllokadën institucionale” si shkak të ngecjeve.