Zëvendësministri i Forcës së Sigurisë së Kosovës, Burim Ramadani ka deklaruar se nuk ka vend për konfuzion sa i përket transformimit të FSK-së në ushtri.

Pas deklaratave të Sekretarit të Përgjithshëm të NATO-s, Jens Stoltenberg, i cili tha është koha e gabuar për transformimin e ushtrisë, Ramadani tha se “transicioni i FSK-së është në përputhje me angazhimet bilaterale dhe multilaterale të Kosovës me shtetet anëtare të NATO-s, sikurse edhe me Selinë Qendrore të NATO-s”.

“Duhet të kuptojmë vështirësitë e NATO-s për konsensus për shkak të shteteve jonjohëse aty. Ne fatkeqësisht nuk kemi pasur qasje direkte në kryeqytetet e disa prej këtyre shteteve jonjohëse për t’ia spjeguar procesin dhe planin e Kosovës. Sidoqoftë, ne mirëpresim thellimin e angazhimit të NATO-s në Kosovë, përmes NALT-it dhe Bashkëveprimit të Zgjeruar” ka shkruajtur ai në Facebook.

Ramadani shtoi se transformimi i ushtrisë do të jetë proces dhjetëvjecar dhe se Kosova do të vazhdojë angashimin për anëtarësim në NATO.

“Transicioni i FSK-së është proces legjitim dhe gradual. Pas miratimit të ligjeve, FSK do të ketë transicion 10 vjeçar për të përmbushur kapacitetet e plota operacionale. Kosova synon të jetë anëtare e NATO-s, i takon këtyre vlerave dhe do tê thellojë përpjekjet për këtë Qëllim Kombëtar. Kosova dhe FSK është e gatshme që krah për krah me ushtritë e shteteve anëtare të NATO-s të ndihmojë paqen, sigurinë dhe stabilitetin në rajone të ndryshme nëpêr botë”.