Deputeti shqiptar Argjend Bajrami në Kuvendin e Serbisë ka thënë se shqiptarët e Luginës janë të vetmit që iu duhet një orë rrugë për të arritur në spitalin më të afërt edhe në rast të emergjencave.

Për këtë ai ka kërkuar ndërtimin e një spitali për qytetarët shqiptarë, që sipas tij, edhe në nevojat më jetike po diskriminohen, njofton Klan Kosova.

“Dua të ju rikujtoj se qytetarët e Luginës së Preshevës që edhe për problemet më të vogla shëndetësore duhet të shkojnë në spitalin më të afërt, i cili ndodhet afër 50 kilometra nga shtëpitë tona. Pra, ta keni parasysh që për çdo rast të ndihmës së parë, neve na duhet të paktën një orë derisa të arrijmë në spitalin më të afërt, kurse mbi numrin sa i përket pacientëve që kanë vdekur gjatë rrugës para se të mbërrijnë në spitale, këtë gjë as që dua ta komentoj, pasi këto janë kushtet më çnjerëzore që nuk ekzistojnë as në vendet më të varfra të planetit. Ku ishte Qeveria juaj gjatë këtyre kohërave të vështira për Preshevën?”.

Ai gjithashtu ka pyetur se a ndodh në ndonjë rajon tjetër të Serbisë që ambulanca të vonohet kaq shumë, përfshirë edhe komunat shumë më të vogla se Bujanoci dhe Presheva.

“Pse qytetarët tonë s’kanë asnjë spital në regjion? Vetë kryeministrja Ana Bërnabiq ka thënë në Beograd: “Sa më në jug, aq më trishtë”. Çfarë do të thotë kjo? Kjo do të thotë se Qeveria kurrë nuk ka qenë e pranishme për t’u shërbyer qytetarëve të Preshevës dhe se tani nuk ekziston vullnet i mirë politik për të zgjidhur problemet tona”.