Kreu i AAK-së, Ramush Haradinaj në Interaktiv të KTV-së ka thënë se filozofi slloven, Slovaj Zhizhek është llom politik.

Haradinaj thotë se Zhizhek nuk guxon të ofendojë 62 të zgjedhur të popullit. Ai përmendi numrin 62 duke llogaritur vetëm deputetët shqiptarë, megjithëse për rrëzimin e Qeverisë Kurti votuan 82 deputetë.

“Nuk mundet me thënë një Slavoj Zhizhek i Sllovenisë, llomi politik. Ai është llom e përtej llomit, se nuk guxon ai të ofendojë 62 njerëz të zgjedhur të vendit tim, një shumicë të parlamentit të Kosovës. Nëse ai e ka këtë të drejtë edhe unë e kam një të drejtë t’i them: Ti je llom, i takon një llomi botëror në këtë rast, të lobistëve të dallaverxhive, se 62 nuk mund të jenë llom. Ndoshta janë 10, 20 por s’ka mundësi që të jenë 62”, ka thënë Haradinaj.

Zhizhek sot ka bërë një shkrim rreth rënies së Qeverisë Kurti, duke thënë se ky ishte grushtshteti i parë i koronavirusit, derisa ka theksuar se, “Qeveria Kurti ishte ferrë në mish për të gjitha forcat politike, të cilat sipas tij, janë në gjendje të mbijetojnë vetëm në baltinën e pasioneve etnike e religjioze”.