Ish-ministri Jabllanoviq dëshmon për klimën e tendosur dhe frikën me të cilën ballafaqoheshin oponentët e Listës Serbe në veri të Kosovës

Prishtinë | 28 Shk 2022 | 16:57 | Nga Leonora Kolukaj Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Në Gjykatën Themelore në Prishtinë është mbajtur seanca e radhës në gjykimin për vrasjen e politikanit serb, Oliver Ivanoviq, me ç’rast u dëgjuan dy dëshmitarë.

Aleksandër Jabllanoviq, ish-ministër në Qeverinë e Kosovës, ka treguar për tensionet dhe vështirësitë substanciale të funksionimit të pluralizmit në pjesën e veriut të Kosovës, para dhe pas vrasjes së Ivanoviqit, i konsideruar si lider opozitar në Mitrovicën Veriore.

Sipas avokatëve, të cilët folën për gazetarët pas seancës, Jabllanoviq ka theksuar se ai vetë ka qenë i detyruar që të bartë jelek antiplumb për sigurinë e tij.

“Të gjitha këto shpërfaqin një klimë jashtëzakonisht të tendosur dhe një klimë jodemokratike me të cilën janë ballafaquar oponentët politikë në atë pjesë të Kosovës”, ka thënë Musa Damati, mbrojtës i të akuzuarës Silvana Arsoviq.

“Ka vazhduar procesi gjyqësor në rastin voluminoz për vrasjen e politikanit Ivanoviq. Sot është dëgjuar pranë Departamentit Special të Gjykatës Themelore në Prishtinë një dëshmitar i cili ka qenë ish-ministër në qeverinë e ish-kryeministrit Isa Mustafa dhe i cili në bazë të dëshmisë së tij na ka njoftuar lidhur me vështirësitë substanciale të funksionimit të pluralizmit në pjesën e veriut të Kosovës”, shtoi Damati.

“Dëshmitari ka theksuar se gjatë kampanjës së tij zgjedhore, ai ka qenë i detyruar që të bartë edhe jelek antiplumb për sigurinë e tij. Të gjitha këto shpërfaqin një klimë jashtëzakonisht të tendosur dhe një klimë jodemokratike me të cilën janë ballafaquar oponentët politikë në atë pjesë të Kosovës”, theksoi Damati.

Edhe avokati Tomë Gashi tha se në dëshminë e tij, ish-ministri Jabllanoviq, tregoi për konotacionin politik dhe për tensionet që kanë qenë në kohën e vrasjes së Oliver Ivanoviqit.

“Ai deklaroi atë që e konsideron ai që sipas dëshmisë sa tij ai konsiderohet si armik i shtetit të Serbisë. Besoj që këtë e ka thënë për shkak të implikimit në këtë rast të Milan Radojqiqit, i cili thotë për rolin e tij si kryesues apo nënkryetar apo çfarë pozicioni ka pasur në Listën Srpska”, tha Gashi.

“Mendoj që tani po hyjmë në një fazë thuajse gati përfundimtare të këtij gjykimi, meqenëse prokurori ka propozuar që një pjesë e madhe e dëshmive të dëshmitarëve të lexohen, sepse nëse të gjithë dëshmitarët tentohen të ftohen në këtë gjykatë do të jetë thuajse e pamundur për shkak se një pjesë e tyre jetojmë në Serbi janë të paqasshëm nga organet e drejtësisë së Republikës së Kosovës, ndërsa një pjesë e madhe e dëshmive janë jo aq relevante”.

“Ne edhe sot kemi pasur dëshminë e një zyrtari policor të Kosovës… Një pjesë e madhe e atyre që vijnë nga veriu i Kosovës dhe që kanë pasur funksione, politike, që kanë qenë zyrtarë policorë, apo ndonjë funksion tjetër, shihet qartas që janë të frikësuar, për të mos thënë të ndikuar”, u shpreh Gashi.

Dëshmia e Aleksandër Jabllanoviqit

Dëshmitari i dytë në seancën e sotme për vrasjen e Oliver Ivanoviqit ishte Aleksandër Jabllanoviq, ish-kryetar i Listës Serbe dhe ish-ministër në Qeverinë e Kosovës, në kohën e Isa Mustafës.

Ai iu përgjigj pyetjeve të prokurorit Bajram Qerkini për angazhimin e tij në politikë.

Jabllanoviq tregoi se deri në vitin 2014 ka qenë kryetar i Listës Serbe. Në vitin 2017 është ndarë nga kjo parti.

Dëshmitari tregoi se nuk ka marrë pjesë në zgjedhje lokale, por ka marrë pjesë në fushatë, pasi kandidat për kryetar ka qenë babai i tij. Ai tha se gjatë fushatëse kanë qenë në kërcënim të vazhdueshëm nga Lista Serbe.

“Mund të them se i ka ngjarë çdo gjëje përpos fushatës. Kemi qenë në kërcënim konstant nga Lista Serbe, të cilën në atë kohë, si dhe tani, jo formalisht e ka udhëhequr Millan Radoiçiq”.

“Kam veshur jelekun antiplumb prej muajit prill 2017, deri nga fundi i 2020-së. Banesa që jetoj me familje një kohë të gjatë ka qenë e siguruar nga ana e forcave të Policisë së Kosovës. Kam qenë dukshëm i kufizuar në lëvizje. Më është tërhequr vërejtja nga policia dhe miqtë që duhet të kujdesem që t’i kryejë vetëm obligimet e domosdoshme që i kam. Që në mbrëmje nuk guxoj me dalë vetëm nga shtëpia, t’i shmangem shëtitjeve vetëm, hedhjes së mbeturinave etj. Nga shtëpia kam dalë me dy-tri automjete, që të mos dihet se në cilën veturë jam, sepse kam qenë i përcjellë nga disa djem nga Leposaviqi. Për këtë e kam informuar edhe Policinë e Kosovës, Kur e ndezi veturën unë jam detyruar t’i bëjë 1-2 rrathë para se t’i fusë fëmijët në veturë, sepse kanë qenë kërcënime të tilla.. Ka qenë tentim për të na ndaluar që të merremi me politikë”.

Jabllanoviqi tregoi se këto presione kanë qenë më të shprehura në vitin 2017 dhe 2019.

Jabllanoviq tregon se me tani të ndjerin Oliver Ivanoviq ka pasur kontakte dy herë. Hera e parë ne një debat televiziv për të cilin tha se e kishte organizuar një OJQ në Mitrovicë, kurse hera e dytë në pjesën veriore të Mitrovicës, kur Oliver Ivanoviq, kishte qenë në paraburgim”.

Dëshmitari tha se nga ai takim me Ivanoviqin, nuk kishte marrë ndonjë informacion nga ai nëse ndjehej i kërcënuar apo se kishte ndonjë presion nga Lista Srpska ose persona.

Gjatë fushatës së zgjedhjeve në vitin 2017 i ishte djegur vetura, Oliver Ivanoviqit. Për këtë Jabllanoviq tha se për këtë informacionet i ka marrë në lajme.

Në ditën kritike, pra në ditën kur u vra politikani serb, Oliver Ivanoviq, dëshmitari Aleksandër Jabllanoviq tha se ka qenë me familje në pushim.

“Atë mëngjes jam zgjuar vonë në ora 10, 10:30. Kur e kam ndezur telefonin kam parë shumë thirrje. Në mëngjes e kam zakon të shikoj lajme, ai ka qenë në të gjitha portalet”.

Pas vrasjes së Ivanoniqit, Jabllanoviqi tregon se për ngushëllim ka shkuar vetëm në lokalet e partisë, ku tek dera është takuar edhe me bashkëshorten e Oliver Ivanoviqit, Milenën për të cilën thotë se nuk kanë biseduar gjatë, por vetëm i ka shprehur ngushëllime.

Jabllanoviq citoi edhe fjalët e Milenës t’i ketë thënë: “Ruaju, a po e sheh e mbytën këta banditë Oliverin! Ruaju!”

Më herët gjatë ditë u dëgjua dëshmitari Nebojsha Roshiq, babai i të akuzuarit Marko Roshiq, i cili u përgjigj në pyetjet e prokurorit, gjykatësit e avokatit të palës së dëmtuar.

Ai tha se në ditën kritike, nuk ka qenë në orar të punës si pjesëtar i Policisë së Kosovës.

Roshiq tha se ka punuar si udhëheqës i ndërrimit. Por, shtoi se me rastin e vrasjes nuk është marrë, pasi siç tha ai, nuk ishte detyrë e tij, por e hetuesisë.

Dëshmitari tha se për vrasjen e Oliver Ivanoviqit është njoftuar përmes telefonit, dhe se e ka menduar që nuk është vrasje, por sulm në zemër.

Dëshmitari u pyet nëse është në dijeni për kamerat e sigurisë, se kush i ka udhëhequr apo kush i ka shikuar. Ai tha se as për këtë nuk është në dijeni.

Sipas aktakuzës nga Prokuroria Speciale, të pandehurit Nedejklo Spasojeviq, Marko Roshiq, Rade Basara dhe Silvana Arsoviq, akuzohen se më 16 janar 2018, në qytetin e Mitrovicës, në bashkëpunim me të pandehurit Zheiko Bojiç, Zvonko Veselinoviç dhe Milan Radoiçiq, të cilët gjenden në arrati dhe me dy të pandehur të tjerë që deri më tani janë të panjohur për organet e rendit, duke vepruar si grup i organizuar dhe i strukturuar, me hierarki në grup dhe me role të përcaktuara, nën udhëheqjen e të pandehurve Zvonko Veselinoviç dhe Milan Radoiçiç, në atë mënyrë që të gjithë të pandehurit në vazhdimësi dhe në bashkëveprim ndërmjet veti, me qëllim të shtrirjes së kontrollit në pjesën veriore të Mitrovicës, si në jetën politike dhe ekonomike dhe veprimtarinë e përgjithshme të grupit kriminal të organizuar, kanë vepruar me dashje dhe dijeni për të kryer veprën penale të vrasjes së rëndë, ku secili nga të pandehurit ditën kritike kur edhe ka ndodhur vrasja e tani të ndjerit Oliver Ivanoviq, kanë kryer veprime inkriminuese konkrete për qëllim të grupit në fjalë, me ç’rast si pasojë e veprimeve të këtij grupi kriminal të organizuar ka ardhur deri te vrasja e tani të ndjerit Ivanoviq.

PSRK fillimisht kishte ngritur aktakuzë më 27 dhjetor 2019 kundër Nedeljko Spasojeviq, Marko Roshiq, Silvana Arsoviq, Dragisha Markoviq, Zharko Jovanoviq dhe Rade Basara për veprat penale “Pjesëmarrje ose organizimi i grupit kriminal të organizuar”, “Keqpërdorim i pozitës apo autoritetit zyrtar”, “Ndihmë në kryerjen e veprës penale Vrasje e rëndë”, “Mbajtja në pronësi, kontroll ose posedim të pa autorizuar të armëve”, “Zbulimi i fshehtësisë zyrtare”, “Keqpërdorim i detyrës zyrtare në bashkëkryerje” dhe “Manipulim me prova, në bashkëkryerje”.

Seanca fillestare ishte mbajtur me 11 shkurt 2020, kurse Gjykata Themelore në Prishtinë, më 6 prill 2020, kishte refuzuar kërkesat për hudhjen e aktakuzës dhe kundërshtimet e provave.

Pas ankesave të katër avokatëve, Gjykata e Apelit kishte aprovuar ankesat e mbrojtësve dhe çështja ishte kthyer në rivendosje.

Sipas Apelit, në rivendosje nga gjykata e shkallës së parë duhet të eliminohen kundërthëniet, duke i dhënë mundësi prokurorit për t’u deklaruar ose për ta korrigjuar dhe plotësuar aktakuzën në mënyrë që aktakuza të jetë në përputhje me nenin 241 të KPPRK-së.

Çka përmban aktakuza e re?

Më pas, me 10 nëntor 2020, Prokuroria Speciale kishte përpiluar aktakuzën, ku thuhet se të pandehurit Nedejklo Spasojeviq, Marko Roshiq, Rade Basara dhe Silvana Arsoviq, nga viti 2014 deri në vitin 2018, respektivisht me datën 16 janar 2018, në qytetin e Mitrovicës, në bashkëpunim me të pandehurit Zheiko Bojiç, Zvonko Veselinoviç dhe Milan Radoiçiç, të cilët gjenden në arrati dhe me dy të pandehur tjerë që deri më tani janë të panjohur për organet e rendit, duke vepruar si grup i organizuar dhe i strukturuar, me hiearki në grup dhe me role të përcaktuara, nën udhëheqjen e të pandehurve Zvonko Veselinoviç dhe Milan Radoiçiç, në atë mënyrë që të gjithë të pandehurit në vazhdimësi dhe në bashkëveprim ndërmjet veti, me qëllim të shtrirjes së kontrollit në pjesën veriore të Mitrovicës, si në jetën politike dhe ekonomike dhe veprimtarinë e përgjithshme të grupit kriminal të organizuar, kanë vepruar me dashje dhe dijeni për të kryer veprën penale të vrasjes së rëndë, ku secili nga të pandehurit ditën kritike kur edhe ka ndodhur vrasja e tani të ndjerit Oliver Ivanoviq, kanë kryer veprime inkriminuese konkrete për qëllim të grupit në fjalë, me ç’rast si pasojë e veprimeve të këtij grupi kriminal të organizuar ka ardh deri te vrasja e tani të ndjerit Ivanoviq.

I pandehuri Nedejlko Spasojeviq, thuhet se duke vepruar si anëtar i grupit kriminal, ka ndihmuar në kryerjen e veprës penale vrasje e rëndë, ka bashkëpunuar ngushtë me të dyshuarit e panjohur që të kryejnë vrasjen e tani të ndjerit Ivanoviq, me ç’rast me dashje dhe dijeni i ka ndihmuar të dyshuarit e panjohur në kryerjen e veprës penale të vrasjes së rëndë, duke krijuar kushtet dhe mënjanuar pengesat për kryerjen e kësaj vepre penale, ashtu që fillimisht i njëjti u ka mundësuar të dyshuarve që të lëviznin me veturën zyrtare të policisë të markës “Golf IV”, karavan, më pas i ka dërguar të njëjtit tek vetura “Opel Astra”, ngjyrë e kaltër, pa targa, nga e cila veturë është shtënë në drejtim të ndjerit Ivanoviq, e që për pasojë ka ndërruar jetë në spitalin e Mitrovicës.

Tutje, thuhet se përveç kësaj i pandehuri Spasojeviq, në ditën kritike së bashku me dy policët që kanë qenë të parët në vendin e ngjarjes Zharko Jovanoviq dhe Dragisha Markoviq, me dashje dhe dijeni ka shpërdorur detyrën e tij zyrtare duke mos i kryer detyrat e domosdoshme të përcaktuara me ligj, me qëllim të përfitimit të çfarëdo dobie për vete ose për personin tjetër, në atë mënyrë që ka lejuar personat e paautorizuar të futen në vendin e ngjarjes dhe të dëmtojnë provat që kanë qenë aty, ku edhe kishte ndodhur vrasja e të ndjerit Ivanoviq.

Sipas aktakuzës, i pandehuri Marko Roshiq, duke vepruar si anëtar i grupit kriminal, ka ndihmuar në kryerjen e veprës penale vrasje e rëndë, duke bashkëpunuar ngushtë me të pandehurit Spasojeviq, Basara, Bojiç, Veselinoviç, dhe Radoiçiç, në atë mënyrë që me veturën e tij të llojit “Santa Fe”, ka përcjellë çdo lëvizje të tani të ndejrti Ivanoviq, para vrasjes së tij, ku pas vrasjes, në rrobat e të ndjerit është gjetur një letër, në të cilën kanë qenë të dhënat e veturës “Santa Fe”, ngjyrë e zezë. Kjo veture thuhet se pas vrasjes së viktimës e ka përcjellë edhe vëllain e viktimës Mirosllav Ivanoviq, e njëjta veturë është në pronësi dhe përdorim të pandehurit Roshiq dhe vetura e përmendur parkohet tek restoranti “Grey” që është pronë e të pandehurit Milan Radoiçiç.

Aktakuza thotë se i pandehuri Rade Basa, në cilësinë e zyrtarit policor, konkretisht hetues në Njësinë e Hetimeve Regjionale në Mitrovicë- Veri, nuk i ka përmbushur detyrat e tij zyrtare me qëllim të përfitimit të çfarëdo dobie për vete apo për personin tjetër dhe i njëjti duke vepruar si anëtar i grupit kriminal, njëkohësisht si hetues policor, ka bashkëpunuar ngushtë me Zheljko Bojiq dhe me grupin kriminal të organizuar e që është udhëhequr ngga Milan Radoiçiç, nga i cili grup ka marrë urdhra për të fshehur dhe eliminuar dëshmitë-provat, dhe nga grupi kriminal është angazhuar që t’i fsheh gjurmët e krimit, t’i selektojnë rastet nën hetim, ku në ato raste ku pjesëtarët e grupit kriminal të Milan Radoiçiç, kanë qenë në cilësinë e të dyshuarve, nuk i ka hetuar me qëllim që ato raste të mos zbardhen dhe të mbesin të pazbuluara, me ç’rast me dashje nuk i ka kryer detyrat e domosdoshme të përcaktuara me ligj, transmeton Betimi për Drejtësi.

Për të pandehurën Silvana Arsoviq, thuhet se si anëtare e grupit kriminal të organizuar, duke bashkëpunuar ngushtë me të dyshuarit që kanë qenë në koordinim për vrasjen e Ivanoviq, ka ndihmuar në kryerjen e veprës penale të vrasjes së rëndë, duke bërë krijimin e kushteve dhe mënjanimin e pengesave për kryerjen e veprës penale në atë mënyrë që në kohën e aktit të kryerjes së vrasjes të Ivanoviq, e pandehura ka qenë në dijeni se kamerat e sigurisë në zyret e SDP-së kanë qenë të ndalura në mënyrë të dhunshme, duke u ç’kyçur nga rryma, me ç’rast u është mundësuar lehtësim të dyshuarve që të mos incizohen nga kamerat e sigurisë, kur të kryhet akti i vrasjes ndaj të ndjerit Ivanoviq. E njëjta thuhet se me datën 16 janar 2018, në ora 08:16, menjëherë pas vrasjes së Ivanoviqit, i ka aktivizuar kamerat e sigurisë në zyret e partisë SDP, e cila ka qenë duku punuar si administratore në këto zyre dhe si person i vetëm në objektin e përmendur në kohën kur është kryer vrasja.

Me këtë të pandehurit, sipas prokurorisë, kanë kryer veprën penale pjesëmarrje ose organizimi i grupit kriminal të organizuar nga nenin 283, paragrafi 3 lidhur me paragrafin 1 të KPRPK-së lidhur me veprat penale vrasje e rëndë sipas nenit 179, paragrafi 1.9 të KPRK-së dhe veprën penale keqpërdorim i pozitës apo autoritetit zyrtar sipas nenit 442, paragrafi 2, nënparagrafi 2.1lidhur me paragrafin 1 të KPRK-së.

Tutje, aktakuza thotë se i akuzuari Dragisha Markoviq, me datën 16 janar 2019, në cilësi të zyrtarit policor, pa autorizim i ka vënë në dispozicion personit tjetër informatën, e cila përbën fshehtësi zyrtare, në atë mënyrë që derisa ishte në detyrë zyrtare nga vendi i ngjarjes, ku edhe kishte ndodhur vrasja e Ivanoviq, me qëllim të publikimit apo shfrytëzimit të asaj informate, jashtë territorit të Republikës së Kosovës, duke i raportuar një zyrtari policor në shtetin e Serbisë ende pa u konfirmuar lajmi se është vrarë tani i ndjeri Ivanoviq.

Me këtë akuzohet se ka kryer veprën penale “zbulim i fshehtësisë zyrtare”.

Në vijim thuhet se Dragisha Markoviq dhe Zharko Javanoviq, në datën 16 janar 2018, në cilësi të personave zyrtare, kanë shpërdorur detyrën e tyre zyrtare duke mos i kryer detyrat e domosdoshme të përcaktuara me ligj, në atë mënyrë që pas vrasjes së Ivanoviq, kanë dal në vendin e ngjarjes, nuk e kanë siguruar mirë vendin e ngjarjes duke lënë persona të tjerë që të ndërhyjnë në atë hapësirë, si dhe të njëjtit me qëllim që t’i bëjnë të pashfrytëzueshme provat në procedura zyrtare, kanë manipuluar me to, duke i hequr dhe fshehur ato, ashtu që fillimisht i pandehuri Dragisha Markoviq bën me dorë në drejtim të gëzhojës, e cila ishte gjetur në vendin e ngjarjes, e të cilën më pas i pandehuri Jovanoviq e merr, e fut në xhep dhe së bashku me Markoviq largohen nga vendi i ngjarjes.

Me këtë akuzohet se kanë kryer veprën penale keqpërdorim i detyrës zyrtare në bashkëkryerje.

Ndërsa, Jovanoviq, gjithashtu akuzohet për mbajtje në pronësi, kontroll ose posedim të paautorizuar të armëve, pasi të njëjtit me datën 10 shkurt 2018, sipas aktakuzës, gjatë kontrollit të shtëpive dhe objekteve përcjellëse dhe gjatë kontrollit të banesës së tij, është gjetur dhe konfiskuar një armë e markës TT, e kalibrit 7.62 mm, dhe 9 fishekë të kalibrit 7.62 mm, të cilat i pandehuri i ka poseduar pa leje.

Të ngjashme