Kina ndëshkon aktivistin Wang Quanzhang me katër vjet burgim

Prishtinë | 28 Jan 2019 | 09:27 | Nga Ekonomia Online

Avokati kinez për të drejta të njeriut, Wang Quanzhang është dënuar me më shumë se katër vjet burgim, ka njoftuar një gjykatë në veri të Kinës.

Gjykata Popullore e Shkallës së Dytë në Tianjin ka thënë përmes një deklarate me 28 janar se Wang është “shpallur fajtor për destabilizim të fuqisë së shtetit, prandaj është dënuar me katër vjet e gjashtë muaj burgim, si dhe i është ndaluar pjesëmarrja në fushën politike për pesë vjet”.

Ende nuk është bërë e ditur nëse atij do t’i hiqen nga dënimi ditët që tashmë ka kaluar në burg.

Wang, 42 vjeçar, ka qenë në mesin e 200 avokatëve dhe aktivistëve ligjorë që janë ndaluar më 2015, në kohën kur pati shpërthyer pakënaqësia e këtij grupi shoqëror.

Wang ka qenë anëtar i kompanisë ligjore, Fengrui, dhe ka marrë pjesë në shumë raste të ndjeshme, por edhe ka kritikuar publikisht Partinë Komuniste që tani është në pushtet.

Gruaja e Wang, Li Wenzu, ka thënë se nuk i është lejuar që të marrë pjesë në gjykimin e burrit të saj.

Li ka bërë fushatë të pandërprerë me qëllim të lirimit të Wangut.

Diplomatë nga ambasadat e Shteteve të Bashkuara, Zvicra, Britania dhe Gjermania kanë qenë jashtë gjykatës kur ka nisur gjykimi.

Ata kanë kërkuar që të jenë brenda në sallë, mirëpo u është ndaluar një gjë e tillë.

Gjykimi i aktivistëve të të drejtave të njeriut në Kinë, zakonisht ndodh në kohën e Krishtlindjeve, pasi shumica e diplomatëve dhe gazetarëve perëndimorë janë në pushim.

Fjalë Kryesore:

Të ngjashme