Nënkryetari i LSI-së, Petrit Vasili, përmes një deklarate ka denoncuar atë që ai e quan “masakër elektorale”, ku sipas tij, gjatë numërimit të votave në Durrës, vota që i përkisnin LSI-së janë shpallur fillimisht të pavlefshme dhe më pas i kanë kaluar Partisë Socialiste.

“Jam këtu para jush për të denoncuar live në kohë reale, atë që po ndodh në Durrës, një masakër e vërtetë elektorale, gjatë procesit të numërimit të votave për kandidatët që kanë marrë pjesë në zgjedhje. Vetëm në 4 kuti, nga qindra kuti që janë për t’u numëruar, vetëm në 4 kutitë e para janë gjetur rreth 20 vota që i përkasin Lëvizjes Socialiste për Integrim, ose që janë vlerësuar të pavlefshme, por që çuditërisht janë numëruar si vota të Partisë Socialiste”, tha Petrit Vasili, njofton Euronews.al.

Z. Vasili ka ftuar publikisht operacionet dhe vëzhguesit ndërkombëtarë, si dhe përfaqësuesit e KQZ-së në Tiranë, që të jenë pjesë dhe të monitorojnë të gjithë tavolinat e numërimit nga afër, me pretendimin se procesi i numërimit nuk ka qenë transparent.

“Ky proces është i shpërndarë në të gjithë qendrat e votimit dhe monitorimi, verifikimi gjatë numërimit i çdo vote dhe çdo procesverbali do të shikoni sesi do vazhdojë të provojë këtë masakër elektorale që ndërkohë po ndodh në Durrës por që ka ndodhur anë e mbanë vendit”, u shpreh Petrit Vasili.