Kryeprokurori i Shtetit, Aleksandër Lumezi, u ka kërkuar prokurorëve që të bëjnë punë më të madhe në trajtimin e rasteve, sidomos të atyre që lidhen me vrasjen e figurave publike.
Në Konferencën Vjetore të Prokurorëve, Lumezi ka kërkuar nga vartësit e tij që të bëjnë më shumë në zbardhjen e vrasjeve të figurave publike, në luftën kundër korrupsionit dhe të vazhdojnë e ta përmirësojnë cilësinë e luftës kundër terrorizmit.
Lumezi tha këtë vit pret nga prokurorët zbardhjen e rasteve të vrasjeve të figurave publike para, gjatë dhe pas luftës dhe kryerësit e këtyre veprave të dënohen.
Po ashtu, gjatë këtij viti Lumezi tha se duhet të punojnë në luftën kundër krimit të organizuar e korrupsionit.
Ai tha se vetëm vitin e kaluar kanë zgjidhur 480 raste të korrupsionit. Por, theksoi se lufta ndaj korrupsionit është sfidë. “Korrupsioni nuk luftohet me fjalë e premtime, por me veprime konkrete, në mënyrë që të luftohet përshtypja se në këtë vend të korruptuarit nuk ndëshkohen”, tha Lumezi.
Sipas tij, Prokuroria e Shtetit gjatë vitit të kaluar ka treguar efikasitet të lartë duke zgjidhur mbi 66 mijë lëndë.
Lumezi tha së në vitin 2017 kanë shënuar efikasitet edhe sa i përket ngritjes së aktakuzave dhe përfundimin e tyre me aktvendime dënuese.
Sipas tij, pavarësisht punës që është bërë vitin e kaluar, kjo nuk do të thotë se duhet të vetkënaqen pasi organi i akuzës ka sfida të shumta.