Koreja e Jugut po forcon masat anti COVID-19 në dhe rreth kryeqytetit shumë të populluar Seul, me kufizime të reja që hyjnë në fuqi nga dita e diele.

Të gjitha restorantet dhe kafenetë do të duhet të mbyllin dyert e tyre në orën 21:00, por kanë të drejtë të ofrojnë shërbimet përmes sistemit “delivery”.

Objektet e brendshme sportive, përfshirë palestrat, urdhërohen të mbyllen gjersa vizitat në shtëpitë e kujdesit do të kufizohen. Të gjitha akademitë pas shkollës gjithashtu do të jenë të mbyllura, raporton BBC.

Një e treta e të gjitha kompanive publike dhe zyrave qeveritare do të punojnë nga shtëpia gjersa kompanitë private po inkurajohen të bëjnë të njëjtën gjë.

Masat vijnë pasi zyrtarët shëndetësorë paralajmërojnë se vendi është në prag të një shpërthimi mbarëkombëtar.

Për më shumë se 10 ditë, numri i përditshëm i rasteve të reja ka qenë mbi 200. Ky është akoma i ulët në terma globale, por për një vend që kishte më pak se 30 infeksione të reja ditore, po shihet si shkak alarmi.

Ndryshe, shumë predikues të Kishës Presbyterian besojnë se virusi është pjesë e një komploti qeveritar dhe nuk pranojnë të testohen.