Vetëm në tremujorin e parë të vitit 2018 tre persona kanë gjetur vdekjen në vendin e tyre të punës. Zyrtarë të BSPK-së kanë thënë për gazetën “Zëri” se vdekjet e fundit në vendet e punës janë bërë fenomen shqetësues, shkruan sot Gazeta “Zëri”.

Gjatë periudhës janar-mars të këtij viti kanë humbur jetën tre persona në vendin e tyre të punës, teksa 13 të tjerë kanë përfunduar me lëndime të lehta e disa edhe me lëndime të rënda.

Ndonëse ekziston Ligji për Sigurinë dhe Shëndetin në Punë, sipas zyrtarëve nga Bashkimi i Sindikatave të Pavarura ky ligj nuk po respektohet. Ata gjendjen e sigurisë në punë e kanë konsideruar alarmante. Në anën tjetër, zyrtarë nga Këshilli për Mbrojtjen e të Drejtave dhe Lirive të Njeriut fajin e kanë hedhur tek inspektorët. Sipas tyre, dënimet për punëdhënësit të cilët i shkelin rregullat e punës janë simbolike dhe që nuk ndikojnë në ndërmarrjen e masave të mjaftueshme për sigurinë në vendet e punës.

Sipas ekspertëve të sigurisë, kjo situatë ka ardhur si pasojë e neglizhencës nga ana e inspektorëve pasi që nuk ka inspektim të mjaftueshëm në vendpunishtet. E për këtë gjë përveç inspektorëve ministrorë këta të fundit nuk i kursejnë as ata komunalë.