Deputetja e PDK-së, Eliza Hoxha, e ka konsideruar gabim fokusimin prej 25 % në prodhimin e energjisë nga hidrocentralet, për të përmbushur objektivat për energji të ripërtërishme, raporton Ekonomia Online.

Hoxha që është edhe anëtare e Komisionit Hetimor për hidrocentralet, shtoi se burimi i energjisë së ripërtërishme është më e gjerë se sa vetëm nga hidrocentralet.

“Fokusimi për të përmbushur obligimin 25 për qind për energji të ripërtërishme vetëm nga hidrocentralet ka qenë gabim”.

Ajo në debati e organizuar nga “FOL”, për këtë çështje, pohoi se harmonizimi i dokumenteve nga ministritë me planin hapësinor të Kosovës po ashtu deri tash nuk ka ndodhur, raporton EO.

“Në kuptimin e përgjithshëm jemi vend i varfër në aspektin e resurseve ujore dhe duhet siguruar së pari ujitjen e tokave bujqësore”, tha ajo.

Duke folur për punën e Komisionit Hetimor ajo ka thënë se do të hartojnë një plan ku më pas të fillojë puna në teren dhe aty ku ka shkelje punën duhet ta bëjë prokuroria.