Prokuroria e Prizrenit është ende në pritje të analizave të videove të kamerave të sigurisë nga Qendra e Paraburgimit në Prizren për rastin e vdekjes së aktivistit të Vetëvendosjes, Astrit Dehari.

Prokurori i rastit Metush Biraj tha se ende janë në pritje të analizave që po bëhen në Austri.

“Jemi në pritje të analizave, të cilat i kemi dërguar në Austri. Sipas mendimit tim këto analiza do të kthehen brenda dy muajve”, tha Biraj.

Prokurori Biraj tha se rasti Dehari zyrtarisht është ende i hapur dhe sipas tij këto analiza të cilat pritet të kthehen nga shteti austriak do të heqin të gjitha dilemat rreth rastit, shkruan Kallxo.com.

“90 për qind të veprimeve hetimore janë kryer në këtë rast”, tha Biraj.

Astrit Dehari ishte aktivist i “Vetëvendosjes”.

Ai vdiq më 5 nëntor të vitit të kaluar në Qendrën e Paraburgimit në Prizren, ku po mbahej si i dyshuar për sulmin me mjet shpërthyes kundër ndërtesës së Kuvendit të Kosovës.

Raporti i Institutit të Mjekësisë Ligjore rreth shkaqeve të vdekjes së Astrit Deharit i bërë publik më 18 nëntor 2016 përcakton se ai ka bërë vetëvrasje.