Deda troç për LDK-në: Heshtin me muaj, zgjohen vetëm për fotografi e deklarata

Deda u ndal te zhvillimet e brendshme në LDK, ku sipas tij, mungesa e angazhimit të vazhdueshëm të disa deputetëve dhe përplasjet mes figurave të partisë po e dëmtojnë imazhin e saj publik.

Ai përmendi edhe reagimet rreth largimit të fotografisë së ish-presidentit Ibrahim Rugova dhe Deklaratës së Pavarësisë nga vendi i nderit në Presidencë, duke i konsideruar këto si kauza që nuk duhet të jenë në qendër të angazhimit politik të deputetëve.

Duke komentuar tensionet e brendshme, përfshirë debatin mes Vjosa Osmanit dhe Hykmete Bajramit, Deda tha se LDK-së i nevojitet një udhëheqje e re, e cila do të dalë nga vota e anëtarësisë dhe jo nga kalkulimet brenda strukturave partiake.

“Dy deputete të LDK-së u shtyhen mes veti, edhe unë mendoj që LDK-ja kështu ka me qenë qysh është tash, derisa nuk e zgjedh në mënyrë demokratike një lidership të ri vitin e ardhshëm i cili do të jetë më të vërtetë, vullnet i bazës e jo matematikave i konjukturave të brendshme në LDK. Dhe nëse nuk e zgjedh nuk ka me u rrit më shumë se që është aktualisht sipas sondazheve që po e qesin, e që është keq për Kosovën”, tha Deda.

Kritikat e tij u shtrinë edhe te qëndrimi i kësaj partie ndaj zhvillimeve që lidhen me Ligjin për ndryshimin e Dhomave të Specializuara. Sipas Dedës, LDK-ja duhet të ketë një rol më të dukshëm në këtë proces dhe të ofrojë qëndrime konkrete për hapat që duhet të ndërmerren.

“LDK-ja me na tregu çfarë momenti është ky, apo komunikon Abdixhiku me Kurtin e Çitakun. A mundet diqysh me ju ndihmua nëse ka naj problem që me fitua Kosova ja 10-15 ditë kohë që me u konsulltu me BE-në me ba një ligji të mirë”, deklaroi ai në Tëvë1.