Reshitaj kritikon gjendjen në shëndetësi: Mbi 12 mijë pacientë në lista të pritjes në 16 klinika të QKUK-së

Gjatë interpelancës me ministrin e Shëndetësisë, Arben Vitia, lidhur me vdekjen e pacientes me kancer të gjirit që kishte mbetur katër muaj pa terapi dhe mungesën e barnave onkologjike, Reshitaj tha se dobësitë e sistemit shëndetësor janë të pranishme nga kujdesi parësor deri te institucionet e nivelit terciar.

Ajo theksoi se kujdesi parësor shëndetësor duhet të jetë baza e sistemit, ndërsa kritikoi numrin e ulët të mjekëve që zgjedhin specializimin në mjekësi familjare.

“Sot dobësitë shtrihen pothuajse në çdo hallkë të sistemit shëndetësor. Nga qendrat e mjekësisë familjare tek spitalet rajonale e deri tek QKUK-ja, e cila, fatkeqësisht, mbingarkohet me punë. Ministria mund të flasë për reformat, nuk mund të flasë për reforma të qëndrueshme. Kur baza e sistemit vazhdon të jetë e dobët. Qytetari që nesër mund të jetë pacient me një sëmundje malinje, takimin e parë do të duhej ta kishte me mjekun familjar. Prandaj, kujdesi i parësor shëndetësor është themeli i shëndetësisë. Por mungesa e angazhimit serioz në këtë bazament të shëndetësisë e dëshmon edhe me rastin e specializantëve të cilët, ndonëse krijohet kushte dhe mundësi për specializimin në mjekësi familjare, të marrin ka 4 ose 7 vetë”, tha ajo.

Reshitaj ngriti shqetësimin edhe për listat e gjata të pritjes në QKUK, duke kërkuar përgjegjësi për pasojat që, sipas saj, pritjet e zgjatura po u shkaktojnë pacientëve.

“Kjo tregon për demotivimin apo mosmotivimin e kësaj qeverie për të krijuar mundësi që mjekët tanë ta zgjedhin edhe këtë specializim shumë të rëndësishëm. Në fund të vitit 2025, vetëm në 16 klinika të QKUK-së, të dashur qytetarë, vetëm në 16 klinika të QKUK-së, mbi 12 mije pacientë ishin në lista të pritjes. Dhe, siç e dini, vazhdojnë edhe deklaratat e mjekëve, të cilët thonë se për shkak të pritjeve të stërzgjatura, pacientëve po u përkeqësohet gjendja shëndetësore. Dhe më thoni mua, kush mori deri sot përgjegjësi për gjendjen e përkeqësuar shëndetësore të pacientëve të cilët kanë pritur me muaj e vite të tëra për një trajtim shëndetësor?”, tha ajo.