Seanca e parë e përbërjes së 15-të të Kuvendit Kombëtar të Serbisë fillon sot në orën 10:00. Rendit të ditës i përkasin verifikimi i mandateve parlamentare, si dhe zgjedhja e Kryetarit dhe e nënkryetarëve të Kuvendit.
Serbia zgjedh sot kryetarin e ri të Kuvendit, dy emra në garë për postin e presidentit në detyrë

Seanca u thirr më 8 nëntor nga Kryetarja në largim e Kuvendit, Ana Brnabiq, e cila aktualisht ushtron edhe detyrën e Presidentes së Serbisë.
Siç deklaroi ajo në atë kohë, rendi i ditës përbëhet nga gjashtë pika; përveç verifikimit të mandateve dhe zgjedhjes së udhëheqjes së Kuvendit, ai përfshin emërimin e Sekretarit të Përgjithshëm dhe zgjedhjen e anëtarëve të trupave punues parlamentarë.
Deri në zgjedhjen e Kryetarit të ri të Kuvendit, seancën do ta drejtojë Stojan Radenoviq – deputeti më i vjetër në moshë – i cili u zgjodh përmes listës së Partisë Përparimtare Serbe. Ai e ka mbajtur të njëjtin rol edhe gjatë konstituimit të përbërjes së mëparshme në vitin 2024.
Mediat serbe kanë përmendur Katarina Scepanoviq-in, mësuese në Gjimnazin Filologjik në Beograd, dhe profesorin Aleksandar Cupiq si kandidatë të mundshëm për Kryetar të Kuvendit, të propozuar nga “Lista e Studentëve”. Megjithatë, “Lista e Studentëve” ende nuk e ka shpallur zyrtarisht kandidatin e saj.
Zgjedhja e një Kryetari të ri të Kuvendit do të sjellë gjithashtu ndryshim në postin e ushtruesit të detyrës së Presidentit të Serbisë. Ana Brnabić e ka mbajtur këtë detyrë që kur Aleksandar Vučić dha dorëheqjen nga posti i Presidentit të Republikës. Sipas Kushtetutës, nëse mandati i presidentit përfundon para kohe, ai zëvendësohet nga Kryetari i Kuvendit Kombëtar. Kjo situatë mund të zgjasë maksimumi tre muaj, periudhë gjatë së cilës Kryetari i Kuvendit është i detyruar të shpallë zgjedhjet presidenciale.
Studentëve nuk iu dha leje për të marrë pjesë në seancë, ndaj ata kanë njoftuar për një tubim në Parkun Pionirski, pranë ndërtesës së Kuvendit. Para fillimit të seancës, Aleksandar Vuciq hodhi poshtë pretendimet e ish-ambasadorit belg se Bashkimi Evropian i kishte bërë presion për të pranuar rezultatet zgjedhore natën e zgjedhjeve, duke paralajmëruar se do t’i bëjë të ditura “të gjitha detajet” në Kuvendin Kombëtar.

















