Ushtarët italianë dhe bullgarë të caktuar në Komandën Rajonale Perëndim (RC-W), në kuadër të misionit të udhëhequr nga NATO, KFOR, kanë zhvilluar një stërvitje me qitje të vërtetë në poligonin Voloire, pranë Kampit Villaggio Italia në Pejë.

Sipas njoftimit të KFOR-it, stërvitja mblodhi pjesëtarë të kombësive të ndryshme dhe kishte për qëllim shkëmbimin e përvojave dhe praktikave më të mira, si dhe rritjen e ndërveprueshmërisë ndërmjet njësive pjesëmarrëse.

“Stërvitja, e cila mblodhi së bashku personel nga kombësi të ndryshme, synoi të nxisë shkëmbimin e ekspertizës dhe praktikave më të mira, duke forcuar njëkohësisht ndërveprueshmërinë mes njësive pjesëmarrëse”, thuhet në njoftim.

KFOR thekson se aktivitete të tilla shërbejnë për të ruajtur gatishmërinë e lartë operacionale dhe ndërgjegjësimin situacional të personelit të tij.

“Nëpërmjet aktiviteteve të tilla, personeli i KFOR-it mban një nivel të lartë të gatishmërisë operacionale dhe ndërgjegjësimit situacional, duke dëshmuar përkushtimin e vazhdueshëm të KFOR-it për të garantuar një mjedis të sigurt dhe të qetë për të gjithë njerëzit që jetojnë në Kosovë”, thuhet më tej.

KFOR rikujton se vazhdon zbatimin e mandatit të tij, të bazuar në Rezolutën 1244 të Këshillit të Sigurimit të OKB-së të vitit 1999.

“KFOR vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt dhe të qetë për të gjithë njerëzit në Kosovë dhe për të garantuar lirinë e lëvizjes, në çdo kohë dhe në mënyrë të paanshme. KFOR punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si reagues të sigurisë”, thotë njoftimi.