Të dërguarit e posaçëm të Shteteve të Bashkuara, Steve Witkoff dhe Jared Kushner, do të marrin pjesë në takimet në Oslo për të diskutuar situatën në Ukrainë me presidentin Volodymyr Zelensky, teksa Rusia po vazhdon sulmet e ashpra ndaj vendit, në një kohë të tensioneve në rritje mes Kievit dhe Uashingtonit.

Qeveria norvegjeze njoftoi përmes një deklarate se Zelensky do të shkonte në Norvegji më 20 tetor për t’u takuar me presidentin finlandez, Alexander Stubb, dhe kryeministrin norvegjez, Jonas Gahr Store, me qëllim që “përpjekjet diplomatike të marrin një qasje më konstruktive”.

“Ukraina ka kërkuar që të dërguarit e posaçëm të SHBA-së, Steve Witkoff dhe Jared Kushner, t’u bashkohen takimeve”, tha Store. Në deklaratë u shtua se Witkoff do të udhëtojë drejt Oslos, ndërsa Kushner, i cili është i sëmurë, do të marrë pjesë përmes video-lidhjes.

Zelensky do të takohet po ashtu me mbretin e Norvegjisë dhe do të vizitojë Parlamentin e vendit, thuhet në deklaratë.

Në shumicën e bisedimeve mes SHBA-së dhe Ukrainës kanë marrë pjesë Witkoff dhe Kushner, si dhe negociatorë të caktuar nga Zelensky, por jo vetë presidenti ukrainas. As Zelensky dhe as presidenti rus, Vladimir Putin, nuk kanë marrë pjesë në bisedime të drejtpërdrejta mes Ukrainës dhe Rusisë, që kanë për synim përfundimin e luftës.

Takimet në Oslo mbahen në një kohë tensionesh mes presidentit amerikan, Donald Trump, dhe udhëheqësit ukrainas.

Trump sugjeroi se Zelensky nuk duhet të përfshihet në negociatat për t’i dhënë fund pushtimit në shkallë të plotë që Rusia nisi kundër shtetit fqinj në shkurt të vitit 2022. Ky është deklarimi i tij i fundit që shpreh dyshime për përkushtimin e Zelenskyt ndaj përpjekjeve për arritjen e paqes.

“Sinqerisht, mendoj se ka ardhur koha që dikush tjetër të negociojë në emër të Ukrainës”, tha Trump.

Këto deklarata vijnë mes shqetësimeve në Ukrainë për një sërë hapash që, sipas Zelenskyt, do të ishin në favor të Putinit. Gjatë dy javëve të fundit, Trump ka njoftuar për një marrëveshje që nxit eksportet ruse të naftës dizel dhe ka hequr përkohësisht sanksionet që pritej të hynin në fuqi në bazë të një ligji që ai nënshkroi muajin e kaluar.

Trump tha po ashtu më 19 tetor se është i hapur për një takim trepalësh me Putinin dhe udhëheqësin kinez, Xi Jinping, në margjinat e samitit APEC që do të mbahet muajin e ardhshëm në Kinë.

“Nëse presidenti Xi dëshiron ta zhvillojë, unë do ta zhvilloja”, tha Trump. Megjithatë, udhëheqësi amerikan shtoi se qëllimi kryesor i takimit do të ishte diskutimi i “armëve bërthamore dhe çarmatimit bërthamor”, e jo i luftës së Rusisë kundër Ukrainës.

“Do ta bëja, jo aq shumë për Ukrainën, sepse Rusia, sinqerisht, është sjellë mirë në lidhje me Ukrainën. Nuk ka bërë shumë”, u tha Trump gazetarëve kur u pyet nëse do të merrte pjesë në një takim me Putinin dhe Xinë për të diskutuar Ukrainën.

Para vizitës së tij në Oslo, Zelensky tha se ka zhvilluar një bisedë “substanciale” dhe “konstruktive” me sekretarin amerikan të Shtetit, Marco Rubio.

Zelensky tha se diskutoi për disa çështje, përfshirë raketat për pengimin e raketave balistike, sistemet e paralajmërimit të hershëm për sulmet ruse me raketa balistike, si dhe për situatën lidhur me sistemet satelitore të komunikimit Starlink dhe Starshield.

“Jam mirënjohës për gatishmërinë e tij për të ndihmuar dhe për qëndrimin e tij të qartë”, shkroi Zelensky në një postim në X më 20 tetor.

Ndërkohë, Rusia vazhdoi sulmet ndaj Ukrainës, duke vrarë të paktën tre persona në rajonin e Kievit dhe duke plagosur disa të tjerë.

Trupat e viktimave u gjetën teksa ekipet e emergjencës po luftonin me një zjarr në një objekt për prodhim dhe magazinim jashtë kryeqytetit ukrainas, shkroi në Telegram Tymur Tkachenko, guvernatori ushtarak i rajonit.

Në një sulm tjetër, një dron rus goditi pranë autostradës Kiev-Odesa, duke vrarë tre persona dhe plagosur katër të tjerë, sipas raportimeve paraprake që thirreshin në informacione të zyrës së prokurorit të rajonit të Kievit dhe autoriteteve rajonale. Autoritetet thanë se po verifikojnë numrin e viktimave dhe të plagosurve.

Sulme me dronë u raportuan po ashtunë rajonet e Harkivit, Sumit, Odesës dhe Dnipropetrovskut, si dhe në rajonet Hmelnitski, Ternopil dhe Lviv, në perëndim të Ukrainës.

Gjatë natës, forcat ruse sulmuan tri objekte energjetike në rajonin e Odesës, njoftoi më 20 tetor kompania energjetike në Ukrainë DTEK, duke shtuar se pas sulmit më shumë se 30.000 familje mbetën pa rrymë.

Ndërkohë, kanalet monitoruese në Telegram, duke cituar banorë lokalë, raportuan se një depozitë e karburantit dizel mori flakë pasi dronë ukrainas goditën një objekt nafte në rajonin Tambov të Rusisë.

Ushtria ruse e ka konfirmuar menjëherë sulmin e raportuar, por tha se forcat e saj të mbrojtjes ajrore kanë penguar dhe shkatërruar 136 dronë ukrainas, përfshirë disa mbi rajonin Tambov./REL/