Dy shpërthime kanë ndodhur gjatë festimeve publike në qytetin jugor të Lashkarit në Afganistan, duke lënë të vdekur dy persona dhe duke e plagosur guvernatorin e provincës Helmand. Lajmin e kanë bërë të ditur zyrtarët e sigurisë.

Shpërthimet ndodhën në kohën kur po festohej “Dita e Bujqve” në një stadium të hapur, ku morën pjesë rreth një mijë persona.

Sipas një dëshmitari, guvernatori provincial, Mohammad Yasin Khan, ka qenë afër shpërthimeve dhe është larguar shpejt nga vendi i ngjarjes. Nuk dihet saktë se cila është gjendja e tij shëndetësore.

Sipas zyrtarëve të një spitali, dy persona janë vrarë dhe 23 të tjerë janë plagosur. Dyshohet se shpërthimet janë shkaktuar nga mjetet e montuara shpërthyese.

Ky shpërthim nuk është rasti i parë i dhunës gjatë festimeve për ta shënuar vitin e ri tradicional. Të enjten e kaluar, gjashtë persona u vranë dhe 23 u lënduan. Përgjegjësinë për këtë sulm e mori Shteti Islamik.

Viti i ri tradicional festohet në një pjesë të madhe të Afganistanit, por disa islamistë janë kundër këtyre festimeve, duke thënë që ato janë kundër Islamit, shkruan “Reuters”.