Deputeti i Lidhjes Demokratike të Kosovës, Avdullah Hoti, ka kërkuar nga Qeveria që menjëherë të ndajë një shumë fikse për gjëra elementare për familjet e prekura nga vërshimet.

Ai ka thënë se në mbledhjen e sotme të Qeverisë nuk është ndarë asnjë cent për kompensimin e familjeve që kanë pësuar nga vërshimet në Skenderaj, Klinë, Istog e Mitrovicë.

“Vërshimet – ende asnjë cent nuk është ndarë nga Qeveria për familjet e prekura. Shumë vendime qenkan marrë në mbledhjen e Qeverisë sot, por asnjë cent nuk qenka ndarë për kompensimin e familjeve që pësuan nga vërshimet në Skenderaj, Klinë, Istog, Mitrovicë e komuna të tjera. Rezerva shtetërore është për situata kur ndodhin shpenzime të paparashikuara”.

“Ftoj Qeverinë tu ndajë këtyre familjeve menjëherë një shumë fikse për gjërat elementare të jetës: shporet, frigorifer, shtrat, tepihë dhe ushqime bazike. Disa familje kanë humbur edhe rrobat e trupit. Ka familje me të moshuar e fëmijë shumë të vegjël, të cilët nuk mund të kthehen në shtëpitë e vërshuara pa u meremetuar plotësisht”, ka shkruar Hoti në Facebook.
Ai tutje është shprehur se asnjë meremetim nuk mund të bëhet në këto kushte atmosferike.

“Ka kohë për vlerësim të detajuar të dëmeve, si në ekonomitë shtëpiake, ashtu edhe në biznese e bujqësi”, ka përfunduar deputeti i LDK-së.