Misioni i NATO-s në Kosovë – KFOR ka reaguar pas raportimeve në një medie kosovare se forcat serbe kanë hyrë në territorin e Kosovës.

KFOR-i, nëpërmes një komunikate për medie, tha se informacioni nuk është i saktë.

“KFOR dëshiron t’i përgjigjet një lajmi të publikuar nga Indeksonline pasditen e sotme, i cili paraqet një njësi serbe duke drejtuar armët drejt civilëve në territorin e Kosovës. Ky informacion nuk është i saktë dhe nuk pasqyron atë që ka ndodhur në të vërtetë”, thuhet në komunikatën dërguar medieve.

Në komunikatë, KFOR-i i referohet kufirit ndërmjet Kosovës dhe Serbisë si “vijë kufitare administrative”.

Në komunikatë thuhet se sot, më 17.02.2024 në 14:45h, një njësi letoneze që i përkiste KFOR-it po përgatitej të fillonte një patrullë të planifikuar të sinkronizuar me Forcat e Armatosura Serbe, përgjatë të “dy anëve të vijës kufitare administrative”.

Sipas KFOR në kohën kur u bë fotografia në fjalë, personeli letonez po koordinohej me homologët e tyre serbë, të cilët ishin pozicionuar në anën e tyre “të vijës kufitare administrative”.

“Është e rëndësishme të theksohet se skuadra letoneze ishte pozicionuar më tej pas liderit të tyre, i cili ishte i përfshirë në koordinimin e aktiviteteve me Forcat e Armatosura Serbe”.

Tutje theksohet se fotografia mund të jetë prerë për të përjashtuar pjesët që përshkruanin liderin letonez duke biseduar me udhëheqësin e SAF.

“Patrulla e sinkronizuar është kryer në mënyrë profesionale dhe në respekt të plotë të procedurave të përcaktuara mirë. KFOR-i vazhdon të zbatojë mandatin e tij të OKB-së, duke ofruar një mjedis të sigurt dhe të sigurt për të gjitha komunitetet që jetojnë në Kosovë, në çdo kohë dhe në mënyrë të paanshme”, theksohet në komunikatën e Forcës Paqeruajtëse të NATO-s në Kosovë.