Kurti: Uroj që Krishtlindja sivjet të sjellë forcë e shëndet

Prishtinë | 24 Dhj 2020 | 19:59 | Nga Ekonomia Online

Kryetari i Lëvizjes Vetëvendosje, Albin Kurti ka uruar besimtarët katolikë me rastin e Krishtlindjes, duke uruar që kjo festë sivjet të sjellë forcë e shëndet, në kohën kur vendi sikurse e gjithë bota po përballet me pandeminë coronavirus.

Ai ka thënë se “shqiptarët katolikë, ortodoksë, protestantë e ungjillorë, sot presin Krishtlindjen në një situatë padyshim të pazakontë”.

“Kjo festë e rëndësishme kolektive për të krishterët, që çdo vit e presin me ceremoni të bukura e mesha festive, sivjet festohet nën kufizime e masa. Por Lindja e Krishtit është mesazhi universal i shpresës, që vjen te çdo njeri e që triumfon, mesazh i dashurisë që ngadhnjen mbi vetminë e braktisjen. Me shpresë e besim e duke ndenjur pranë me zemra edhe pse në distancë fizike, do ta tejkalojmë këtë sfidë të madhe të pandemisë”, ka shkruar ai në Facebook.

Tutje, ai ka shkruar “uroj që Krishtlindja sivjet të sjellë forcë e shëndet, për besimtarët e krishterë e familjet e tyre, sigurisht edhe për klerikët që shërbejnë në kishat tona”.

“Qoftë e bardhë e sjelltë bekime kjo festë motra e vëllezër të krishterë. Kjo festë e juaja, por që sipas traditës shqiptare të festave fetare urohet e gëzohet gjerësisht nga bashkësia kombëtare, pra është edhe e jona”.

Fjalë Kryesore:

Të ngjashme