Policia e Kosovës gjatë mbrëmjes së djeshme arrestoi një nga zëvendësministrat e Qeverisë Haradinaj.

Zv.ministri që u arrestua është ai i Zhvillimit Rajonal, Musa Cena nga AAK.

Policia tha se ai u arrestua për shkak se dyshohet për përfshirje në veprat penale “Marrje e Ryshfetit” dhe “Keqpërdorim i Pozitës apo Autoritetit Zyrtar”.

E ndaj të njëjtit pritet të caktohet masa e paraburgimit prej një muaji.

Këtë e konfirmoi sot për lajmi.net edhe zëvendësprokurori i Prishtinës, Ibrahim Berisha.

“Ne do ta dërgojmë kërkesën në gjykatë, e ajo brenda 48 orëve vendos lidhur me masën e paraburgimit prej 30 ditëve. Kjo është e sigurt se do të ndodhë. Nëse sot nuk mbahet shqyrtimi gjyqësor, sigurisht se nesër gjykata do ta caktojë seancë”, tha ai.

Theksojmë se Aleanca për Ardhmërinë e Kosovës ende nuk ka dalur me ndonjë deklaratë lidhur me arrestimin e zv.ministrit Cena.