Presidenti Hashim Thaçi, përmes një reagimi në Twitter, i është përgjigjur ambasadorëve të SHBA’së dhe Britanisë, të cilët mbrëmë thanë se nëse shfuqizohet Gjykata Speciale, atëherë rrezikohet e ardhmja e Kosovës.
Thaçi pa i përmendur emrat e atyre që i kanë bërë këto paralajmërime, i ka quajtur ato spekulime, shkruan gazetametro.net.
Ai ka thënë se midis spekulimeve është e rëndësishme që të gjithë të vazhdojnë të jenë të sigurt për të ardhmen e Kosovës dhe proceset e saj demokratike.
Tutje, në reagimin e tij, Presidenti ka thënë se shoqëria dhe udhëheqësia e Kosovës mbeten plotësisht të angazhuar për demokraci, sundim të ligjit, pajtim, dialog dhe marrëdhënie në baza të barabarta dhe të drejta.
Mbrëmë, ambasadorët e SHBA’së dhe Britanisë, në kohën kur po tentohej të procedohej nisma e 43 deputetëve për shfuqizim të Gjykatës Speciale, thanë se nëse do të ndodhte kjo, atëherë Kosova do të rrezikohej, dhe ky do të ishte rreziku më i madh që nga koha e luftës.
Amidst speculations it’s important that everyone continues to be confident about Kosovo’s future and its democratic processes. Kosovo’s society and leadership remain fully comitted to democracy, rule of law, reconciliation, dialogue and relations on an equal and fair basis.
— Hashim Thaçi (@HashimThaciRKS) December 23, 2017