PDK kërkon shkarkimin e Neime Binaku-Isufit, Mustafa: Ka dyshime për shkelje ligjore në Autoritetin e Konkurrencës

Mustafa, i cili është edhe kryetar i Komisionit për Ekonomi, ka thënë se kërkesa për shkarkim vjen si rezultat i parregullsive të pretenduara në këtë institucion.

Sipas tij, arsyet që kanë shtyrë deputetët drejt kësaj nisme përfshijnë dyshimet për shkelje ligjore, moszbatimin e vendimeve të institucioneve administrative dhe gjyqësore, përfshirjen në aktivitete politike të ndaluara me ligj, si dhe mungesën e llogaridhënies para Komisionit parlamentar.

Mustafa ka kritikuar edhe deputetët e Lëvizjes Vetëvendosje, duke i akuzuar se përmes votave të tyre kanë penguar vazhdimisht futjen e kësaj çështjeje në rendin e ditës së Komisionit për Ekonomi.

Ai ka theksuar se mbikëqyrja dhe garantimi i funksionimit të ligjshëm të Autoritetit të Konkurrencës janë përgjegjësi e Kuvendit dhe e të gjithë deputetëve.